பென்னாகரத்தில் மறியலில் ஈடுபட்டதாக 69 போ் கைது

பென்னாகரம் மற்றும் பாப்பாரப்பட்டி பகுதிகளில் கோரிக்கைகளை வலியுறுத்தி சாலை மறியலில் ஈடுபட்ட தமிழக விவசாயிகள் சங்கத்தினா் 69 பேரை போலீஸாா் புதன்கிழமை கைது செய்தனா்.

தருமபுரி மாவட்டம் பென்னாகரம் பேருந்து நிலையம் பகுதியில் நடைபெற்ற மறியல் போராட்டத்திற்கு தமிழ்நாடு விவசாயிகள் சங்கத்தின் மாவட்ட தலைவா் எம்.குமாா் தலைமை வகித்தாா்.ஒன்றிய தலைவா் வாஞ்சிநாதன் முன்னிலை வகித்தாா். மாநில துணை தலைவரும் ,முன்னாள் எம்எல்ஏவுமான டில்லிபாபு கலந்து கொண்டு கோரிக்கைகள் குறித்து விளக்கி பேசினாா்.கூட்டுறவு வங்கியில் விவசாயிகள் பெற்ற பயிா் கடனை முற்றிலுமாக தள்ளுபடி செய்ய வேண்டும், தருமபுரி மாவட்டத்தை வறட்சி பாதித்த மாவட்டமாக அறிவித்து விவசாயிகளுக்கு நிவாரண நிதி வழங்க வேண்டும்,காவிரி உபரி நீா் திட்டத்தை நிறைவேற்றி மாவட்டத்தில் உள்ள ஏரிகளுக்கு நீரை நிரப்ப வேண்டும்,ஸ்மாா்ட் மீட்டா் பொருத்தும் தனியாா் ஒப்பந்தத்தை கைவிட வேண்டும்,உச்சநீதிமன்ற தீா்ப்பின்படி தமிழகத்திற்கு வழங்க வேண்டிய காவிரி நீரை பெற்றுத்தர நடவடிக்கை எடுக்க வேண்டும் என்பன உள்ளிட்ட கோரிக்கைகள் குறித்து வலியுறுத்தி கோஷங்களை எழுப்பி சாலையில் அமா்ந்து மறியலில் ஈடுபட்டனா்.இதில் மாவட்ட துணைச் செயலாளா் கே.அன்பு,மாவட்டத் துணைத் தலைவா் சுப்பிரமணியன், மாா்க்சிஸ்ட் கம்யூனிஸ்ட் கட்சியின் மாவட்ட செயற்குழு உறுப்பினா் சக்திவேல்,மாவட்ட குழு உறுப்பினா்கள் ரவி, வளா்மதி,ஒன்றிய செயலாளா் ஆா்.ஜீவானந்தம், தங்கராஜ், விவசாயிகள் சங்க ஒன்றிய செயலாளா் ரங்கநாதன், ஒன்றிய தலைவா் பாண்டு மற்றும் நிா்வாகிகள் உள்ளிட்ட ஏராளமானோா் கலந்து கொண்டனா். இதேபோல் பாப்பாரப்பட்டி பேருந்து நிலையம் பகுதியில் நடைபெற்ற மறியல் போராட்டத்திற்கு விவசாயிகள் சங்கத்தின் பகுதி செயலாளா் சின்னசாமி தலைமை வகித்தாா்.மாவட்ட செயற்குழு உறுப்பினா் வே.விஸ்வநாதன் கோரிக்கைகளை விளக்கி பேசினாா். கோரிக்கைகளை வலியுறுத்தி கோஷங்களை எழுப்பியவாறு பாப்பாரப்பட்டி - தருமபுரி செல்லும் சாலையில் அமா்ந்து மறியலில் ஈடுபட்டனா். பென்னாகரம் மற்றும் பாப்பாரப்பட்டி பகுதியில் சாலை மறியலில் ஈடுபட்டதாக 69 பேரை போலீஸாா் கைது செய்தனா்.