ஒகேனக்கல்லுக்கு நீர்வரத்துக் குறைவு

கர்நாடக அணைகளிலிருந்து திறக்கப்படும் தண்ணீரின் அளவு குறைக்கப்பட்டு வருவதால், காவிரி ஆற்றில் வரும் தண்ணீரின் அளவுகளும் குறைந்து புதன்கிழமை காலை நொடிக்கு 14 ஆயிரம் கனஅடியாக தண்ணீர் தமிழக-கர்நாடக எல்லையான பிலிகுண்டுலு வழியாக ஒகேனக்கல்லுக்கு வந்து கொண்டிருக்கிறது.
தண்ணீரின் அளவுகள் நாளுக்கு நாள் குறைந்து கொண்டே வருவதால், காவிரி ஆற்றில் நீர்வரத்தும் தொடர்ந்து குறைந்து வருகிறது. இந்த நிலையில், செவ்வாய்க்கிழமை மாலை 6 மணி நிலவரப்படி விநாடிக்கு 17 ஆயிரம் கனஅடியாக வந்த தண்ணீர்,புதன்கிழமை காலை 8 மணியளவில் விநாடிக்கு 14 ஆயிரம் கனஅடியாகக் குறைந்து, தமிழக-கர்நாடக எல்லையான பிலிகுண்டுலு வழியாக ஒகேனக்கல்லுக்கு வந்து கொண்டிருக்கிறது.
மேலும் ஒகேனக்கல் வரும் சுற்றுலாப் பயணிகள் அருவியில் குளிக்க 52-ஆவது நாளாக மாவட்ட நிர்வாகம் தடை விதித்துள்ளது. கர்நாடக அணைகளிலிருந்து திறக்கப்படும் தண்ணீரின் அளவுகளை மத்திய நீர்வளத் துறை அதிகாரிகள் தொடர்ந்து கண்காணித்து வருகின்றனர்.