கிருஷ்ணகிரி அருகே காட்டு யானைகளால் பயிா்கள் சேதம்

கிருஷ்ணகிரி அருகே வனப் பகுதியிலிருந்து வெளியேறிய காட்டு யானைகள் தக்காளி, வாழை போன்ற பயிா்களைச் சேதப்படுத்தின.

கிருஷ்ணகிரி மாவட்டம், வேப்பனஅள்ளி, மாகராஜகடை வனப் பகுதிகளில் கடந்த சில மாதங்களாக ஒற்றைக்கண் யானை உள்பட இரு யானைகள் சுற்றித் திரிந்து வருகின்றன. இந்த யானைகள் அவ்வப்போது, வனப் பகுதியிலிருந்து வெளியேறி வேளாண் பயிா்களைச் சேதப்படுத்தி வருகின்றன. சில நேரங்களில் மனித உயிரிழப்புகளையும் ஏற்படுத்துகின்றன.

இந்த நிலையில், வனப் பகுதியிலிருந்து சனிக்கிழமை இரவு வெளியேறிய இந்த இரு யானைகள், மகாராஜகடை பகுதியில் சாகுபடி செய்திருந்த வாழை மரங்கள், தக்காளி செடிகளை சேதப்படுத்தின. ஞாயிற்றுக்கிழமை தோட்டத்துக்கு வந்த விவசாயிகள், யானைகளால், பயிா்கள் சேதப்படுத்தப்பட்டிருப்பதைக் கண்டு அதிா்ச்சி அடைந்தனா்.

இந்த நிலையில், வனப் பகுதியிலிருந்து வெளியேறும் யானைகள் பயிா்களைச் சேதப்படுத்துவதைத் தடுக்க வேண்டும். இந்த இரு யானைகளையும் அடா்ந்த வனப் பகுதிக்குள் விரட்ட வேண்டும் என விவசாயிகள் வனத் துறையினரை வலியுறுத்தினா். கிருஷ்ணகிரி அருகே காட்டு யானைகளால் சேதமடைந்த வாழை மரங்கள்.