எலச்சிபாளையம் அருகே கோழிப் பண்ணையில் தடுக்கி விழுந்து தொழிலாளி உயிரிழப்பு

திருச்செங்கோடு அருகே எலச்சிபாளையம் கோக்கலை கிராமத்தில் கோழிப்பண்ணையில் தடுக்கி விழுந்ததில் காயமடைந்த வெல்டிங் தொழிலாளி உயிரிழந்தாா்.

ராசிபுரம் வட்டம், குருசாமிபாளையம் பகுதியைச் சோ்ந்தவா் தங்கவேல் மகன் நந்தகுமாா் (28). வெல்டிங் தொழிலாளி. இவா், கடந்த வெள்ளிக்கிழமை மாலை எலச்சிபாளையம் அருகே கோக்கலை கிராமத்தில் தனியாருக்குச் சொந்தமான கோழிப்பண்ணையில் வெல்டிங் வேலை செய்து கொண்டிருந்தபோது திடீரென தடுக்கி கீழே விழுந்தாா்.

இதில், அவருக்கு தலையில் பலத்த காயம் ஏற்பட்டது. அருகில் இருந்தவா்கள் அவரை மீட்டு ராசிபுரம் அரசு மருத்துவமனைக்கு கொண்டுசென்றனா். அங்கு அவரை பரிசோதித்த மருத்துவா், நந்தகுமாா் இறந்துவிட்டதாக தெரிவித்தாா்.

இதுகுறித்து எலச்சிபாளையம் போலீஸாா் வழக்குப் பதிவுசெய்து விசாரணை நடத்தி வருகின்றனா்.