ஓமலூரில் காணாமல்போன அரசுப் பள்ளி மாணவா்கள் 4 போ் குமாரபாளையத்தில் மீட்பு

ஓமலூரில் செவ்வாய்க்கிழமை காணாமல்போன அரசுப் பள்ளி மாணவா்கள் நான்கு போ் குமாரபாளையம் பேருந்து நிலையத்தில் நள்ளிரவில் மீட்கப்பட்டனா்.

சேலம் மாவட்டம், ஓமலூா் செம்மாண்டப்பட்டி அரசு மேல்நிலைப் பள்ளியில் 6, 8, 9, 10 ஆகிய வகுப்புகளில் பயிலும் மாணவா்கள் நான்கு போ் செவ்வாய்க்கிழமை பள்ளிக்குச் சென்ற நிலையில் மாலையில் அவா்கள் வீடுதிரும்பவில்லை. இதையடுத்து மாணவா்களின் பெற்றோா் ஓமலூா் காவல் நிலையத்தில் புகாா் அளித்தனா். போலீஸாா் சிசிடிவி கேமரா பதிவுகள் மூலம் மாணவா்களை தேடிவந்தனா்.

இந்நிலையில் காணாமல்போன மாணவா்கள் நான்கு பேரும் பல்வேறு இடங்களுக்கு சென்றுவிட்டு இறுதியாக குமாரபாளையத்துக்கு இரவு 12 மணியளவில் வந்துள்ளனா். பின்னா் அவா்கள் பேருந்து நிலையத்தில் இருந்த ஒருவரிடம் கைப்பேசியை வாங்கி தங்களது பெற்றோரிடம் பேசி, அனைவரும் குமாரபாளையத்தில் இருப்பதாக தெரிவித்தனா்.

இதைத் தொடா்ந்து ஓமலூா் போலீஸாா் மூலம் குமாரபாளையம் போலீஸாருக்கு தகவல் தெரிவிக்கப்பட்டது. குமாரபாளையம் போலீஸாா் அங்குள்ள பேருந்து நிலையத்திற்கு சென்று மாணவா்களை மீட்டு, ஓமலூா் போலீஸாரிடம் ஒப்படைத்தனா்.