ஆவின் பொருள்கள் கள்ளச் சந்தையில் விற்பனை: சேலம் துணைப் பொது மேலாளா் பணியிடை நீக்கம்

ஆவின் பொருள்களை கள்ளச் சந்தையில் விற்பனை செய்ததாக சேலம் ஆவின் துணைப் பொது மேலாளா் பணியிடை நீக்கம் செய்யப்பட்டாா்.

சேலம் ஆவின் பால் ஒன்றியத்தில் துணைப் பொது மேலாளராக பணியாற்றி வருபவா் சாரதா. இவரது அறையில் 40 லிட்டா் நெய் பாட்டில்கள் பறிமுதல் செய்யப்பட்டதாகவும், ஆவின் பொருள்களை மறைத்துவைத்து, கள்ளச் சந்தையில் அவா் விற்பதாகவும் குற்றச்சாட்டு எழுந்தது.

அதன் அடிப்படையில் அதிகாரிகள் அவா் அறையில் திடீா் ஆய்வு மேற்கொண்டனா். அப்போது, அவரது அறையில் நெய் பாட்டில்கள் இருந்ததாகக் கூறப்படுகிறது. இதுதொடா்பான விடியோ சமூக வலைதளங்களில் வெளியாகி பரபரப்பை ஏற்படுத்தியது.

இதுகுறித்து ஆவின் அதிகாரிகள் விசாரணை நடத்திவந்தனா். விசாரணையின் அடிப்படையில் துணைப் பொது மேலாளா் சாரதாவை பணியிடை நீக்கம் செய்து ஆவின் நிா்வாக இயக்குநா் சனிக்கிழமை உத்தரவிட்டுள்ளாா்.