வீட்டின் முன் நிறுத்தியிருந்த காரை தீவைத்து எரித்த வழக்கில் இருவா் கைது

சேலம் ராமகிருஷ்ணா சாலை பகுதியில் வீட்டின் முன் நிறுத்தியிருந்த காரை தீவைத்து எரித்த 2 பேரை போலீஸாா் செவ்வாய்க்கிழமை கைது செய்தனா்.

சேலம் அஸ்தம்பட்டி ராமகிருஷ்ணா சாலை பகுதியில் அடுக்குமாடி குடியிருப்பு உள்ளது. இங்கு சரவணக்குமாா் (40) என்பவா் வசித்து வருகிறாா். இவா் ஞாயிற்றுக்கிழமை இரவு தனது நண்பரின் வீட்டில் தீபாவளி பண்டிகையை கொண்டாடிவிட்டு திங்கள்கிழமை அதிகாலை காரில் தனது வீட்டுக்கு வந்து கொண்டிருந்தாா்.

வீட்டுக்கு காா் திரும்பும் வழியில் இருசக்கர வாகனம் காா்மீது மோதியது. உடடினயாக காரை நிறுத்தாத சரவணக்குமாா், அங்கிருந்து தனது வீட்டுக்கு புறப்பட்டு சென்றாா். அவரை பின்தொடா்ந்த நபா்கள், காரின் கண்ணாடியை அடித்து நொறுக்கிவிட்டு தப்பிச் சென்றுவிட்டனா்.

இதுகுறித்து அஸ்தம்பட்டி போலீஸுக்கு தகவல் தெரிவிக்கப்பட்டது. சம்பவ இடத்துக்கு சென்ற போலீசாா் விசாரணை நடத்தினா்.

இந்நிலையில் திங்கள்கிழமை அதிகாலை வீட்டின் முன் நிறுத்தப்பட்டிருந்த சரவணக்குமாரின் காருக்கு சிலா் தீவைத்தனா். இதுகுறித்து அஸ்தம்பட்டி போலீஸாா், அப்பகுதியில் உள்ள சிசிடிவி கேமராக்களை ஆய்வு செய்தனா். அப்போது காருக்கு தீவைத்தது ஏற்காடு அடிவாரம் கொல்லப்பட்டியைச் சோ்ந்த மௌளிதரன் (24), சின்னதிருப்பதியைச் சோ்ந்த மோகன்ராஜ் (24) என்பது தெரியவந்தது. இதையடுத்து, இருவரையும் போலீஸாா் கைது செய்தனா்.