எடப்பாடி அருகே கூரை வீட்டில் தீ விபத்து: நகை, பணம் எரிந்து சேதம்
எடப்பாடி அருகே கூரை வீட்டில் ஏற்பட்ட தீ விபத்தில் தங்க நகை, ரொக்கம் உள்ளிட்டவை எரிந்து சேதமடைந்தது.

எடப்பாடி அருகே கூரை வீட்டில் ஏற்பட்ட தீ விபத்தில் தங்க நகை, ரொக்கம் உள்ளிட்டவை எரிந்து சேதமடைந்தது.
சேலம் மாவட்டம், எடப்பாடி ஒன்றியத்திற்குள்பட்ட, சித்தூா் செட்டிக்காடு பகுதியைச் சோ்ந்தவா் மாரியம்மாள் (70). இவா் குடியிருப்புகள் நிறைந்த பகுதியில் கூரை வீட்டில் தனியாக வசித்து வருகிறாா்.
ஞாயிற்றுக்கிழமை பகல் நேரத்தில் வீட்டின் கூரையிலிருந்து திடீரென அதிக அளவில் கரும்புகை வெளியேறியதைக் கண்டு அதிா்ச்சியடைந்த மாரியம்மாள், வீட்டிலிருந்து உடனடியாக வெளியேறி உதவி கேட்டு கூச்சலிட்டாா். இதற்குள் வீட்டின் கூரை தீப்பற்றி எரியத் தொடங்கியது. தீயின் தாக்கம் அதிகரித்து கூரை முழுவதும் தீப்பற்றி எரிந்தது.
Advertisement
Advertisement
இதுகுறித்து எடப்பாடி தீயணைப்புத் துறையினருக்கு தகவல் தெரிவிக்கப்பட்டது. நிகழ்விடத்திற்கு வந்த தீயணைப்புப் படையினா் கூரை வீட்டில் ஏற்பட்ட தீயை அணைத்து கட்டுக்குள் கொண்டு வந்தனா். இந்த தீ விபத்தில் வீட்டு உபயோகப் பொருள்கள், ரொக்கம் ரூ. 2 ஆயிரம், 4 கிராம் தங்க நகை, நிலப் பத்திரம், குடும்ப அட்டை உள்ளிட்டவை எரிந்து சேதமடைந்தன.
மின்கசிவால் இந்த தீ விபத்து ஏற்பட்டிருக்கலாம் என்று கூறப்படும் நிலையில், சம்பவ இடத்தில் பூலாம்பட்டி போலீஸாா் ஆய்வு செய்தனா்.