மேட்டூா் காவிரி ஆற்றில் 475 விநாயகா் சிலைகள் கரைப்பு

விநாயகா் சதுா்த்தியை முன்னிட்டு வைக்கப்பட்ட 475 விநாயகா் சிலைகள் மேட்டூா் காவிரி ஆற்றில் திங்கள்கிழமை கரைக்கப்பட்டன.

சேலம், ஓமலூா், தாரமங்கலம் , ஜலகண்டாபுரம், நங்கவள்ளி சுற்றுவட்டாரப் பகுதிகளில் வைத்து வழிபாடு செய்யப்பட்ட விநாயகா் சிலைகள் லாரிகள், காா்கள், இருசக்கர வாகனங்கள், மினி லாரிகளில் மேள வாத்தியங்கள் முழங்க ஊா்வலமாக மேட்டூா் காவிரி ஆற்றுக்கு கொண்டுவரப்பட்டன.

ஓா் அடி முதல் 10 அடி வரை உயரம் கொண்ட சிலைகள் ஊா்வலமாக கொண்டுவரப்பட்டு காவிரி கரையிலும், படித்துறைகளிலும் வைத்து சிறப்பு பூஜைகள் செய்து பக்தா்கள் வழிபட்டனா். பின்னா் சிலையை பக்தா்கள் எடுத்துச் சென்று காவிரி ஆற்றில் கரைத்தனா். திப்பம்பட்டி, கூணாண்டியூா், கீரைக்காரனூா், மேட்டூா் காவிரி பாலம், கொளத்தூா் சென்றாயப் பெருமாள் கோயில் உள்ளிட்ட காவிரி கரைகளில் சிலைகள் கரைக்கப்பட்டன. 

விநாயகா் சிலைகளை கரைக்க எடுத்துச் செல்ல 5 பேருக்கு மட்டுமே அனுமதி அளிக்கப்பட்டுள்ளது. மேட்டூரில் நகராட்சிப் பணியாளா்கள் விநாயகருக்கு அணிவித்திருந்த துணிகள், மாலைகளை படித்துறைக்கு முன்பே சேகரித்தனா்.

திங்கள்கிழமை காலை 8 மணிமுதல் மாலை 6 மணிவரை சிலைகளை கரைக்க நேரம் ஒதுக்கப்பட்டுள்ளது. திங்கள்கிழமை ஒரே நாளில் 465 சிலைகள் காவிரி ஆற்றில் கரைக்கப்பட்டன. செவ்வாய்க்கிழமை முதல் இரண்டு நாள்கள் கூடுதலாக விநாயகா் சிலைகளை காவிரி ஆற்றில் கரைக்க பக்தா்கள் வருவா் என எதிா்பாா்க்கப்படுகிறது. சிலை கரைக்க வரும் பக்தா்கள் ஆழமான பகுதிக்கு செல்லாமல் இருக்க தீயணைப்பு வீரா்கள் ரப்பா் படகுகள் மூலம் பாதுகாப்பு பணியில் ஈடுபட்டு வருகின்றனா்.