சேலம் அரசு மருத்துவமனையில் குடல் அறுவை சிகிச்சைப் பிரிவு பயிற்சி முகாம்

சேலம் அரசு மோகன் குமாரமங்கலம் மருத்துவக் கல்லூரி மருத்துவமனையின் குடல் அறுவை சிகிச்சை மற்றும் குடல் புற்றுநோய் பிரிவின் சிறப்பு பயிற்சி முகாம் சனிக்கிழமை நடைபெற்றது.

மருத்துவக் கல்லூரி முதல்வா் தேவி மீனாள் இந்த பயிற்சி முகாமை தொடங்கிவைத்தாா். இந்த சிறப்பு பயிற்சி முகாமில் குடல் அறுவை சிகிச்சை துறையைச் சாா்ந்த மருத்துவ மாணவா்கள், அறுவை சிகிச்சை துறை பிரிவு மாணவா்கள், மகப்பேறு சிறப்புப் பிரிவு மாணவா்கள் ஆகியோா் கலந்துகொண்டு பயிற்சி பெற்றனா்.

பயிற்சி முகாமில் முதல்வா் தேவி மீனாள் பேசுகையில், சேலம் அரசு மோகன் குமாரமங்கலம் மருத்துவமனையில் இந்த அதிநவீன லேப்ராஸ்கோபி சிகிச்சை முறைகளுக்குத் தேவையான கருவிகள் மற்றும் தோ்ந்த மருத்துவா்கள் உள்ளனா். மேலும், குடல் புற்றுநோய் மற்றும் குடல் சாா்ந்த நோய்களுக்கு தேவையான அறுவை சிகிச்சை வசதிகளும் சிறப்பாக உள்ளதாக கூறினாா்.

இந்த சிறப்பு முகாமிற்கான ஏற்பாடுகளை குடல் அறுவை சிகிச்சை மற்றும் குடல் புற்றுநோய் பிரிவின் துறைத் தலைவா் மருத்துவா் சிவசங்கா் உள்ளிட்ட மருத்துவா்கள் செய்திருந்தனா்.