அரசு, தனியாா் நிறுவனப் பணியாளா்களுக்கு வாரத்தில் இரு நாள்கள் விடுமுறை கோரி மனு: தொழிலாளா் துறைச் செயலா் பதிலளிக்க உத்தரவு

அரசு, தனியாா் நிறுவனப் பணியாளா்களுக்கு வாரத்தில் இரு நாள்கள் விடுமுறை வழங்கக் கோரிய மனு தொடா்பாக தமிழக அரசின் தொழிலாளா் நலத் துறைச் செயலா் பதிலளிக்க சென்னை உயா்நீதிமன்ற மதுரை அமா்வு திங்கள்கிழமை உத்தரவிட்டது.

திண்டுக்கல் மாவட்டம், வத்தலக்குண்டு பகுதியைச் சோ்ந்த பாஸ்கா் சென்னை உயா்நீதிமன்ற மதுரை அமா்வில் தாக்கல் செய்த பொது நல மனு:

தமிழக அரசுத் துறைகளில் உயா் பொறுப்பில் உள்ள நிா்வாக அலுவலா்கள், தனியாா் தகவல் தொழில்நுட்பப் பணியாளா்களுக்கு வாரத்தில் இரு நாள்கள் விடுமுறை அளிக்கப்படுகிறது. ஆனால், போக்குவரத்து, மின்சாரம், சுகாதாரத் துறைகளில் பணியாற்றும் தொழிலாளா்கள், அமைப்புசாராத் தொழிலாளா்கள் வாரத்தில் 6 நாள்கள் பணியாற்ற வேண்டும் என்ற நடைமுறை உள்ளது. மேலும், இவா்கள் வாரத்தில் சுமாா் 45.7 மணி நேரத்துக்கும் மேலாகவும் பணியாற்ற நிா்பந்திக்கப்படுவதாக சா்வதேச தொழிலாளா் அமைப்பு சுட்டிக் காட்டுகிறது.

எனவே, தமிழகத்தில் அரசு, தனியாா் நிறுவனங்களில் சுழற்சி முறையில் தொழிலாளா்களைப் பணியமா்த்துவதற்கான சாத்தியக்கூறுகளை ஆராய நிபுணா் குழுவை அமைக்க வேண்டும். இந்திய அரசமைப்பின் 14, 21, 42-ஆவது பிரிவுகளின் கீழும், சா்வதேச தொழிலாளா் அமைப்பின் பரிந்துரை எண் 103-க்கு இணங்கவும், பொதுத் துறை, தனியாா் நிறுவனங்களில் ஒரே மாதிரியாக இரு நாள்கள் வார விடுமுறையைக் கட்டாயமாக்க உத்தரவாதம் அளிக்கும் சீரான கொள்கையை உருவாக்கி அமல்படுத்த உத்தரவிட வேண்டும் என அவா் கோரினாா்.

இந்த மனு உயா்நீதிமன்ற நீதிபதிகள் சி.வி. காா்த்திகேயன், ஆா். சக்திவேல் அமா்வு முன் திங்கள்கிழமை விசாரணைக்கு வந்தது.

அப்போது, நீதிபதிகள் பிறப்பித்த உத்தரவு:

இந்த மனு தொடா்பாக தமிழக தொழிலாளா் நலத் துறைச் செயலா் பதிலளிக்க வேண்டும். இந்த வழக்கு விசாரணை வருகிற அக்டோபா் 7-ஆம் தேதிக்கு ஒத்திவைக்கப்படுகிறது என்றனா் நீதிபதிகள்.