தண்ணீர் வசதியில்லாததால் தேங்கிய நீரை பயன்படுத்தும் அவலம்

கமுதி அருகே கருங்குளத்தில் தண்ணீர் வசதியில்லாததால்  சாலையோரம் வீணாகித் தேங்கியுள்ள நீரை பொதுமக்கள் பயன்படுத்தும் நிலை உள்ளது.
கமுதி அருகே கருங்குளத்தில் சாலையோரங்களில் காவிரி கூட்டுக் குடிநீர் குழாய் சேதமடைந்து  தண்ணீர் கசிந்து, வீணாகி வருகிறது. இவ்வாறு தேங்கி நிற்கும் கழிவுநீரை வடிகட்டி எடுத்து தள்ளுவண்டிகளின் மூலம் குடங்களில் சேகரித்து குடிக்க பயன்படுத்த கிராம மக்கள் எடுத்துச் செல்கின்றனர். மேலும் சாலையோர பள்ளங்களில் தேங்கியுள்ள நீரில் குளித்து, துணிகளை துவைக்கின்றனர்.  இதனால்  வாகனங்கள் செல்லும்போது விபத்து அபாயம் ஏற்பட்டுள்ளது.  கமுதி ஊராட்சி ஒன்றியத்தில் ஊராட்சி நிர்வாகம் சார்பில் குறைந்த அளவு ஆழத்தில் அமைக்கப்பட்ட கைப்பம்பு, ஆழ்துளை கிணறுகளில் தண்ணீர் இல்லாததால் பல லட்ச ரூபாய் மதிப்பீட்டில் அமைக்கபட்ட அவை காட்சி பொருளாக உள்ளன. எனவே போதிய நிதி ஒதுக்கி, அதிக ஆழத்தில் ஆழ்துளை கிணறு அமைக்க வேண்டும் என அப்பகுதி மக்கள் கோரிக்கை விடுத்துள்ளனர். கருங்குளம் பகுதியில் உடனடியாக தண்ணீர் வசதி செய்து தர வேண்டும் என்றும் வலியுறுத்தியுள்ளனர்.