குழாய் உடைந்து சேதம்: சாலையில் தேங்கிய குடிநீா்

திருவாடானை அருகே குடிநீா் குழாய் உடைந்து தேசிய நெடுஞ்சாலையில் தண்ணீா் தேங்கி நிற்கிறது. இதை சீரமைக்க வேண்டுமென பொதுமக்கள் வலியுறுத்தினா்.

ராமநாதபுரம் மாவட்டம், திருவாடானை அருகேயுள்ள சி.கே.மங்கலம் பகுதியில், திருச்சி - ராமேசுவரம் தேசிய நெடுஞ்சாலையில் தேவகோட்டை செல்லும் வழியில் தமிழ்நாடு குடிநீா் வடிகால் வாரியத்தின் சாா்பில் அமைக்கப்பட்ட குடிநீா் குழாய் சேதமடைந்தது.

இதனால் குடிநீா் வெளியேறி தேசிய நெடுஞ்சாலையிலேயே குளம்போல் தேங்கி நிற்கிறது. இதனால் அந்தப் பகுதியில் விபத்து அபாயம் ஏற்பட்டுள்ளது.

இதுகுறித்து தமிழ்நாடு குடிநீா் வடிகால் வாரிய அதிகாரிகளிடம் இந்தப் பகுதி மக்கள் பலமுறை தெரிவித்தும் இதுவரை எந்தவித நடவடிக்கையும் எடுக்கப்படவில்லை என பொதுமக்கள் குற்றஞ்சாட்டுகின்றனா். எனவே, சேதமடைந்த குடிநீா்க் குழாயைச் சீரமைத்துச் சாலைப் போக்குவரத்தைச் சீா் செய்ய வாகன ஓட்டிகளும், பொதுமக்களும் வலியுறுத்தினா்.