திருப்பத்தூரில் தயார் நிலையில் விநாயகர் சிலைகள்

திருப்பத்தூரில் விநாயகர் சதுர்த்தி விழாவையொட்டி மாவட்டம் முழுவதும் பல்வேறு பகுதிகளுக்கு விநாயகர் சிலைகளை அனுப்பும் பணி தீவிரமடைந்துள்ளது.

விநாயகர் சதுர்த்தியை(செப்.17) முன்னிட்டு, சிவகங்கை மாவட்டம் முழுவதும் விநாயகர் சிலை அனுப்புவதற்காக, இந்து முன்னணி சார்பில் கடந்த ஒரு மாதமாக விநாயகர் சிலை தயாரிக்கும் பணி தென்மாபட்டு பகுதியில் நடந்து வந்தது. தற்போது பணிகள் முடிவடைந்த நிலையில் உள்ள இச்சிலைகள் சிவகங்கை, மானாமதுரை, கல்லல், காரைக்குடி, தேவகோட்டை, சிங்கம்புணரி பகுதிகளுக்கு அனுப்பப்படவுள்ளன. சிலை தயாரிப்பு குறித்து நாகசுந்தரம் கூறியது: சிலைகள் தயாரிக்கும் பணியில் காஞ்சிபுரத்தை சேர்ந்த ஸ்தபதி ஞானவேல் தலைமையிலான குழுவினர் ஈடுபட்டனர். இதுவரை 160க்கும் மேற்பட்ட சிலைகள் தயார் நிலையில் வைக்கப்பட்டுள்ளன. இவற்றை மாவட்டத்தின் பல்வேறு பகுதிகளுக்கு அனுப்பும் பணிகள் நடந்துவருகின்றன என்றார்.