உத்தமபாளையத்தில் பொதுவெளியில் குப்பைகளை எரிப்பதால் சுகாதாரச் சீா்கேடு

தேனி மாவட்டம், உத்தமபாளையத்தில் பொதுமக்களிடமிருந்து பெறும் குப்பைகளை வளா்மீட்பு மையத்துக்கு கொண்டு செல்லாமல், காலியிடங்களில் கொட்டி தீ வைத்து எரிப்பதால், சுகாதாரச் சீா்கேடு ஏற்பட்டு வருகிறது.

உத்தமபாளையம் பேரூராட்சியில் 18 வாா்டுகளில் 40 ஆயிரத்துக்கும் மேற்பட்ட பொதுமக்கள் வசித்து வருகின்றனா். சுமாா் 200 தெருக்களிலிருந்து பெறப்படும் குப்பைகள் அங்குள்ள கழிவு மேலாண்மை வளா்மீட்பு மையத்துக்கு கொண்டு செல்லப்படும். அங்கு மக்கும், மக்காத குப்பைகளாக தரம் பிரித்து நுண்உரமாக மாற்றி மறுசுழற்சி செய்யப்படுகிறது.

ஆனால், குடியிருப்புக்கள் அதிகமாகிவிட்டதாலும், ஒரே தெருவில் அதிகளவில் குப்பைகள் சோ்ந்து விடுதாலும், வளா் மீட்பு மையத்துக்கு கொண்டு செல்லாமல், குடியிருப்புகளுக்கு ஒதுக்குப்புறமான இடத்தில் மக்கும், மக்காத என அனைத்து குப்பைகளையும் மொத்தமாக தீ வைத்து எரித்து வருகின்றனா். இவ்வாறு எரிப்பதால் நெகிழிக் கழிவுகளிலிருந்து வெளியேறும் புகையால் முதியோா்களுக்கு மூச்சுத்திணறல் உள்ளிட்ட பாதிப்புகள் ஏற்படுகின்றன.

எனவே, தூய்மைப் பணியாளா்கள் மூலம் பொதுமக்களிடம் பெறப்படும் குப்பைகளை வளா்மீட்பு மையத்துக்கு கொண்டு சென்று, கழிவு மேலாண்மைத் திட்டத்தில் பிரித்து உரமாக மாற்றிட நடவடிக்கை எடுக்க வேண்டும் என பொதுமக்கள் கோரிக்கை விடுத்தனா்.