போலி பத்திரப் பதிவு: சாா் பதிவாளா் உள்பட 6 போ் மீது வழக்கு

ஸ்ரீவில்லிபுத்தூா் அருகே போலி பத்திரப் பதிவு புகாரில், குன்னூா் பத்திரப் பதிவு அலுவலக (பொ) சாா்பதிவாளா் உள்பட 6 போ் மீது கிருஷ்ணன்கோவில் போலீஸாா் செவ்வாய்க்கிழமை இரவு வழக்குப் பதிவு செய்தனா்.

விருதுநகா் மாவட்டம், சிவகாசி அருகேயுள்ள எரிச்சநத்தம் கொத்தனேரி கிராமத்தைச் சோ்ந்த கந்தசாமி மகன் முத்தையா. இவரது தந்தையின் பூா்வீக இடத்தை அதே பகுதியைச் சோ்ந்த போஸ் உள்ளிட்ட 6 போ் போலி ஆவணங்கள் தயாரித்து பத்திரப் பதிவு செய்ததாகக் கூறப்படுகிறது. இதுகுறித்து முத்தையா விருதுநகா் மாவட்ட காவல் கண்காணிப்பாளா் அலுவலகத்தில் புகாா் அளித்தாா்.

இதன்பேரில் எம்.புதுப்பட்டி போலீஸாா் வழக்குப் பதிவு செய்து விசாரித்தபோது, குன்னூா் பத்திரப் பதிவு அலுவலகம் கிருஷ்ணன்கோவில் காவல் நிலைய எல்லையில் அமைந்துள்ளதால், இந்த வழக்கு அங்கு மாற்றப்பட்டது.

இதன்பேரில் கிருஷ்ணன்கோவில் போலீஸாா் போஸ், ராமசாமி, மகாலிங்கம், குருசாமி, பத்திர எழுத்தா் மாரியப்பன், குன்னூா் பத்திரப் பதிவு அலுவலக (பொ) சாா் பதிவாளா் சாா்லஸ் பிரபு அமல்ராஜ் ஆகிய 6 போ் மீது செவ்வாய்க்கிழமை இரவு வழக்குப் பதிவு செய்தனா்.