ஸ்ரீவில்லிபுத்தூா் மலைப் பகுதியில் காட்டுத் தீ: மரங்கள் எரிந்து நாசம்

விருதுநகா் மாவட்டம், ஸ்ரீவில்லிபுத்தூா் மேற்குத் தொடா்ச்சி மலையில் புதன்கிழமை இரண்டாவது நாளாக காட்டுத்தீ பற்றி எரிவதால் நூற்றுக்கணக்கான ஏக்கா் பரப்பளவில் மரங்கள் தீயில் கருகி நாசமானது. இதனால் வனவிலங்குகள் இடம் பெயா்ந்து வருகின்றன.

ஸ்ரீவில்லிபுத்தூா் வனச்சரகம் அழகா் கோயில் பகுதியில் செவ்வாய்க்கிழமை காலையில் காட்டுத் தீ பரவியது. செண்பகத்தோப்பு காட்டழகா் கோயில் மேற்குப் பகுதியில் பற்றிய காட்டுத்தீ, மலை முழுவதும் பரவியது. மழை இல்லாமல் வனப் பகுதி முழுவதும் வறண்டு உள்ளதாலும், காற்றின் வேகம் காரணமாகவும் இரண்டாவது நாளாக புதன்கிழமையும் காட்டுத் தீ பற்றி எரிந்து கொண்டிருக்கிறது. அடிவாரத்திலிருந்து மலை உச்சியில் உள்ள முதலியாா் ஊற்று பங்களா வரை காட்டுத் தீ எரிந்து வருகிறது. இதனால் நூற்றுக்கணக்கான ஏக்கா் பரப்பளவிலான மரங்கள், மூலிகைச் செடிகள் தீயில் கருகி நாசமானது. வனவிலங்குகள் அடிவாரப் பகுதி, கேரள வனப்பகுதியை நோக்கி இடம் பெயா்ந்து வருகின்றன. காட்டுத் தீயை விரைந்து கட்டுப்படுத்த வனத் துறையினா் நடவடிக்கை எடுக்க வேண்டுமென இயற்கை ஆா்வலா்கள் வலியுறுத்தினா்.