இலங்கைக்கு கஞ்சா கடத்த முயன்ற வழக்கில் மேலும் ஒருவர் கைது

நாகை மாவட்டம், வேதாரண்யம் அருகே கடல் மார்க்கமாக இலங்கைக்கு கஞ்சா கடத்த முயன்ற வழக்கில் மேலும் ஒருவர் ஞாயிற்றுக்கிழமை கைது செய்யப்பட்டார்.
வேதாரண்யத்தை அடுத்த பெரியகுத்தகை கடற்கரையில் இருந்து, இலங்கைக்கு கடல் மார்க்கமாக படகில் கடத்தவிருந்த  6 மூட்டைகளில் இருந்த 192 கிலோ கஞ்சாவை கடலோரக் காவல் நிலைய போலீஸார் சனிக்கிழமை பறிமுதல் செய்தனர்.
இதுதொடர்பாக, இலங்கை யாழ்ப்பாணம் மாவட்டம், மருதங்கேணி பகுதியைச் சேர்ந்த சக்திவேல் (44), வேதாரண்யத்தை அடுத்த வானவன்மகாதேவி கிராமத்தைச் சேர்ந்த ஓட்டுநர் ரமேஷ்குமார்(30), கடலோரக் காவல் நிலைய ஊர்க் காவல்படை வீரரான பெரியகுத்தகை பகுதியைச் சேர்ந்த ச.மகேந்திரன் (35) ஆகிய மூவர் கைது செய்யப்பட்டனர். அத்துடன், கஞ்சா மூட்டைகள்,  இலங்கையைச் சேர்ந்த படகு, சுமை ஆட்டோ ஆகியவை பறிமுதல் செய்யப்பட்டன.
மேலும்,  இந்த சம்பவத்தில் தொடர்புடைய இருவரை போலீஸார் தேடிவந்த நிலையில், தலைமறைவாக இருந்த இலங்கை யாழ்ப்பாணம் பகுதியைச் சேர்ந்த சுகுமார் என்கிற ராஜ்குமார்(34) புஷ்பவனம் கடற்கரையில் ஞாயிற்றுக்கிழமை கைது செய்யப்பட்டார். மற்றொருவரான, பெரியகுத்தகை பகுதியைச் சேர்ந்த மூனீஸ் என்கிற  முனீஸ்வரனை (29) போலீஸார் தொடர்ந்து தேடிவருகின்றனர்.