ஓஎன்ஜிசி குழாயில் உடைப்பு: வயல்வெளியில் எண்ணெய் கசிவு

நாகை மாவட்டம், குத்தாலம் அருகே பதிக்கப்பட்டுள்ள ஓஎன்ஜிசி நிறுவனத்துக்குச் சொந்தமான எரிவாயு கொண்டு செல்லும் குழாயில் உடைப்பு ஏற்பட்டதால், வயல்வெளியில் செவ்வாய்க்கிழமை எண்ணெய் கசிவு ஏற்பட்டது.
குத்தாலத்தை அடுத்த சேத்திரபாலபுரத்தில் ஓஎன்ஜிசி நிறுவனத்துக்குச் சொந்தமான எண்ணெய் மற்றும் எரிவாயு சேமிப்புக் கிடங்கு  உள்ளது. கதிராமங்கலம் எண்ணெய் கிணற்றிலிருந்து எடுக்கப்படும் எண்ணெய் மற்றும் எரிவாயு இந்த குழாய் வழியாக சேத்திரபாலபுரத்துக்கு கொண்டு செல்லப்படுகிறது.
இந்நிலையில் செவ்வாய்க்கிழமை அஞ்சலாற்றங்கரை பகுதியைச் சேர்ந்த கோவிந்த் என்பவரது விவசாய நிலத்தின் வழியாக செல்லும் குழாயில், திடீரென உடைப்பு ஏற்பட்டு  எண்ணெய் மற்றும் எரிவாயு நிலத்தின் மேல்புறத்தில் வெளியேறியது. தகவலறிந்து வந்த ஓஎன்ஜிசி நிறுவன அதிகாரிகள், எண்ணெய் கசிவைத் தடுத்து நிறுத்தினர். இதனால், அப்பகுதியில் பரபரப்பு ஏற்பட்டது.