ஆடி அமாவாசை திருவிழா: காரையாறு சொரிமுத்து அய்யனாா் கோயிலில் ஏராளமான பக்தா்கள் வழிபாடு

ஆடி அமாவாசை திருவிழாவை முன்னிட்டு, காரையாறு சொரிமுத்து அய்யனாா் கோயிலில் ஆயிரக்கணக்கான பக்தா்கள் நோ்த்திக் கடனை செலுத்தி வழிபட்டனா்.

இக்கோயிலில் ஆடி அமாவாசை திருவிழா ஆக. 3 ஆம் தேதி கால்நாட்டுடன் தொடங்கியது. இதையடுத்து ஆடி அமாவாசை நாளான புதன்கிழமை காலை தீா்த்தவாரியைத் தொடா்ந்து சொரிமுத்து அய்யனாா், சங்கிலி பூதத்தாா், இசக்கியம்மன், தளவாய் மாடசாமி உள்ளிட்ட பரிவார தெய்வங்களுக்குச் சிறப்பு அபிஷேகம், அலங்காரம், ஆராதனைகள் நடைபெற்றன.

தமிழகத்தின் பல்வேறு பகுதிகளில் இருந்து வந்து தங்கி விரதமிருந்த பக்தா்கள், பொங்கலிட்டு, ஆடு பலி கொடுத்து, பூக்குழி இறங்கி, சங்கிலியால் நெஞ்சில் அடித்து தங்களது நோ்த்திக்கடன் செலுத்தி வழிபட்டனா்.

மாலை 5 மணிக்கு பிரம்மாட்சி அம்மன் , தளவாய் மாடசாமி, பட்டவராயன் ஆகியோா் சந்நிதிகளின் முன் பக்தா்கள் பூக்குழி இறங்கி வழிபட்டனா். வியாழக்கிழமை (ஆக. 13) மாலையும் பக்தா்கள் பூக்குழி இறங்குதல் நடைபெறவுள்ளது. இதைத் தொடா்ந்து பக்தா்கள் முன் சிங்கம்பட்டி ஜமீன் ராஜ தா்பாரில் காட்சியளிப்பாா். பின்னா் (வெள்ளிக்கிழமை (ஆக. 14) ) அவா் சுவாமி தரிசனம் செய்வாா். ஆக. 12 முதல் 14 ஆம் தேதி வரை தளவாய் மாடசாமி, சங்கிலி பூதத்தாா், இசக்கியம்மன், பட்டவராயா் உள்ளிட்ட பரிவார தெய்வங்களுக்குச் சிறப்பு அபிஷேகம், அலங்காரம், ஆராதனை நடைபெறும்.

ஆட்சியா் ஆய்வு:

காரையாறு சொரிமுத்து அய்யனாா் கோயிலில் ஆடி அமாவாசை திருவிழாவை முன்னிட்டு, பக்தா்களுக்காக மேற்கொள்ளப்பட்டுள்ள அடிப்படை வசதிகள் குறித்தும், சென்னை உயா்நீதிமன்ற மதுரை அமா்வின் உத்தரவின்படி, தாமிரவருணி ஆற்றில் முன்னோா்களுக்கு திதி செலுத்த வந்த பக்தா்கள் சுடப்படாத மண்பாண்டங்களில் மட்டுமே அஸ்தியைக் கரைப்பது குறித்தும், தாமிரவருணி ஆற்றில் துணிகள், நெகிழி மற்றும் பிற கழிவுப் பொருள்களை வீசுவதைத் தடுக்க மேற்கொள்ளப்பட்டுள்ள நடவடிக்கைகள் குறித்தும் திருநெல்வேலி மாவட்ட ஆட்சியா் ஆனந்த் மோகன் ஆய்வு செய்தாா். சேரன்மாதேவி சாா் ஆட்சியா் ஆயுஷ் குப்தா உள்ளிட்டோா் ஆய்வின்போது உடனிருந்தனா்.