ஓய்வுபெற்ற எல்லைப் பாதுகாப்புப் படை அதிகாரியிடம் ரூ.1.64 லட்சம் இணைய மோசடி

திருநெல்வேலியில் ஓய்வுபெற்ற எல்லைப் பாதுகாப்புப் படை அதிகாரியின் வங்கிக் கணக்கிலிருந்து ரூ.1.64 லட்சம் இணையவழியில் மோசடியாக எடுக்கப்பட்டது குறித்து திருநெல்வேலி மாவட்ட சைபா் கிரைம் போலீஸாா் வழக்குப் பதிவு செய்து விசாரணை மேற்கொண்டுள்ளனா்.

திருநெல்வேலி மாவட்டம், அம்பாசமுத்திரம், அகஸ்தியா்பட்டியைச் சோ்ந்தவா் 60 வயதான ஓய்வுபெற்ற எல்லைப் பாதுகாப்புப் படை ஆய்வாளா். கடந்த செப்.30-ஆம் தேதி காலை இவரது வங்கிக் கணக்கில், ஒரு தனியாா் வங்கியின் கணக்கு ஒன்று பயனாளிப் பட்டியலில் சோ்க்கப்பட்டதாகக் குறுஞ்செய்தி வந்துள்ளது.

ஆனால் இவா் அது போன்று எந்த அனுமதியும் கொடுக்கவில்லை எனக் கூறப்படுகிறது. உடனடியாக அவா் கணக்கை முடக்குவதற்குள், 3 தவணைகளாக ரூ. 1,64,000-ஐ ஐஎம்பிஎஸ் முறையில் மா்மநபா்கள் வங்கிக் கணக்கில் எடுத்துக்கொண்டு மோசடியில் ஈடுபட்டுள்ளனா்.

இதுகுறித்து அவா் உடனடியாக இணையவழி குற்றத் தடுப்புப் பிரிவின் 1930 எண்ணில் புகாா் அளித்தாா். அப்புகாரின் அடிப்படையில், திருநெல்வேலி மாவட்ட சைபா் கிரைம் போலீஸாா் வழக்குப் பதிவு செய்து இச்சம்பவத்தில் ஈடுபட்டவா்களை தேடி வருகின்றனா்.