நெசவாளா்களின் வாழ்வாதாரத்தை உயா்த்த கைத்தறி ஆடைகளை அணியுங்கள்: குமரி மாவட்ட ஆட்சியா்

நெசவாளா்களின் வாழ்வாதாரத்தை உயா்த்த நாம் கைத்தறி ஆடைகளை அணிய வேண்டும் என்று பொதுமக்களுக்கு கன்னியாகுமரி மாவட்ட ஆட்சியா் மு.பிரதாப் வேண்டுகோள் விடுத்தாா்.

தேசிய கைத்தறி தினத்தையொட்டி, கன்னியாகுமரி மாவட்ட கைத்தறித் துறை சாா்பில் 12-ஆவது கைத்தறி கண்காட்சி, நலத்திட்ட உதவிகள் வழங்கும் விழா மாவட்ட ஆட்சியா் அலுவலக வளாகத்தில் வெள்ளிக்கிழமை நடைபெற்றது.

கண்காட்சியை மாவட்ட ஆட்சியா் மு.பிரதாப் குத்துவிளக்கேற்றித் தொடங்கிவைத்து, புதிய ரக ஆடைகளை பாா்வையிட்டாா். தொடா்ந்து நெசவாளா்களுக்கு நலத்திட்ட உதவிகள் வழங்கி அவா் பேசியதாவது:

இந்திய வரலாற்றில் முக்கியத்துவம் வாய்ந்த சுதேசி இயக்கம் 1905-ஆம் ஆண்டு ஆகஸ்ட் 7-ஆம் தேதி தொடங்கப்பட்டது. சுதேசி இயக்கத்தை நினைவுக் கூரும் வகையிலும், கைத்தறி நெசவாளா்களை சிறப்பிக்கும் வகையிலும் 2015-ஆம் ஆண்டு முதல் ஒவ்வோா் ஆண்டும் ஆகஸ்ட் 7-ஆம் தேதி தேசிய கைத்தறி தினமாக கடைப்பிடிக்கப்பட்டு வருகிறது.

நாட்டின் பொருளாதார செயல்பாட்டில் விவசாயத்துக்கு அடுத்து மிகப்பெரிய அளவில் வேலைவாய்ப்பை அளிக்கும் துறையாக கைத்தறித் தொழில் விளங்குகிறது.

தமிழக முதல்வா் நெசவாளா்களின் வாழ்வாதாரத்தை முன்னேற்ற பல்வேறு நலத் திட்ட உதவிகள், கடனுதவிகள் வழங்கி வருகிறாா்.

கூலி உயா்வு, தொழிலாளா்கள் பற்றாக்குறை, நூல் மற்றும் மூலப்பொருட்களின் விலை உயா்வு, உற்பத்தி பொருள்களுக்கான கொள்முதல் விலை போன்ற நெசவாளா்களின் பல்வேறு கோரிக்கைகள் முதல்வரின் கவனத்துக்குக் கொண்டு செல்லப்பட்டு, அதற்கான தீா்வுகள் தொடா்ச்சியாக வழங்கப்பட்டு வருகின்றன.

பண்டிகை கொண்டாட்டங்களின்போதும், சுற்றுலாத் தலங்களிலும், நெசவாளா்கள் தங்கள் கைத்தறி பொருள்களை விற்பனை செய்ய ஏதுவாக சிறப்பு அங்காடிகள் மாவட்ட நிா்வகத்தால் அமைத்து தரப்படும்.

கைத்தறி துறை உதவி இயக்குநா் உள்ளிட்டோா் இந்த வாய்ப்பை பயன்படுத்தி விற்பனையை பெருக்குவதோடு, நெசவாளா்களின் வாழ்வாதாரத்தை உயா்த்திட முன்வர வேண்டும்.

உலக அளவில் தமிழக நெசவாளா்களின் கைத்தறி ஆடைகளுக்கு அதிக வரவேற்பு உள்ளது. பொதுமக்கள் முடிந்தபோதெல்லாம் கைத்தறி ஆடைகளை அணிந்து, கைத்தறி தொழிலையும் நெசவாளா்களின் வாழ்வாதாரத்தையும் உயா்த்த ஆதரவளிக்க வேண்டும் என்றாா்.

நிகழ்ச்சியில், மாவட்ட ஆட்சியா் ‘முத்ரா’ கடன் உதவி திட்டத்தின் கீழ் 14 நெசவாளா்களுக்கு தலா ரூ. 50 ஆயிரம் வீதம் ரூ. 7 லட்சம் கடனுதவியும், சேமிப்பு, பாதுகாப்புத் திட்டத்தின் கீழ் 8 நெசவாளா்களுக்கு ரூ. 5.92 லட்சம் கடனுதவி வழங்கியதுடன், 4 வயது முதிா்ந்த நெசவாளா்களை பொன்னாடை போா்த்தி கௌரவித்தாா்.

நிகழ்ச்சியில், உதவி ஆட்சியா் பயிற்சி ர.மோனிகா, உதவி இயக்குநா் கைத்தறி ஜெயசுதா, நாகா்கோவில் கோட்டாட்சியா் செந்தில் வேல்முருகன், உசூா் மேலாளா் முருகன், முன்னோடி வங்கி உதவி அலுவலா் காா்த்திக், கைத்தறி அலுவலா் ராம்கண்ணன், அலுவலா்கள் பங்கேற்றனா்.