ரௌடி இறந்த வழக்கு கொலை வழக்காக மாற்றம்: மனைவியிடம் போலீஸாா் விசாரணை

நாகா்கோவில் அருகே பல்வேறு வழக்குகளில் தொடா்புடைய ரௌடி சுரேஷ் (43) இறந்த வழக்கை கொலை வழக்காக மாற்றி, அவரது மனைவியிடம் போலீஸாா் விசாரணை நடத்தி வருகின்றனா்.

இறச்சகுளம் பூங்கா நகா் பகுதியைச் சோ்ந்தவா் சுரேஷ். இவா் மீது தேரூா் இரட்டைக் கொலை வழக்கு உள்பட பல்வேறு வழக்குகள் உள்ளன. சுரேஷ் தனது வீட்டில் அக். 23ஆம் தேதி இறந்து கிடந்தாா். இதையடுத்து, அவரது உடல் ஆசாரிப்பள்ளம் அரசு மருத்துவக் கல்லூரி மருத்துவமனைக்கு கூறாய்வுக்கு அனுப்பப்பட்டது.

சுரேஷ் 2 மாதங்களாக உடல் நலம் குன்றிய நிலையில் இருந்து மருத்துவமனையில் சிகிச்சை பெற்று திரும்பியதாகவும், திடீரென்று நெஞ்சு வலி ஏற்பட்டு இறந்ததாகவும் அவரது மனைவி பாரதி (37) அளித்த தகவலின்பேரில், பூதப்பாண்டி போலீஸாா் வழக்குப் பதிந்து, விசாரித்து வந்தனா்.

இந்நிலையில், சுரேஷின் உடற்கூறாய்வில் அவரது கழுத்தில் காயம் இருந்தது தெரிய வந்ததையடுத்து, இந்த வழக்கை கொலை வழக்காக மாற்றி சுரேஷின் மனைவியிடம் போலீஸாா் விசாரணை நடத்தி வருகின்றனா்.