குமரி மாவட்டத்தில் நீடிக்கும் மழை: திற்பரப்பு அருவியில் குளிக்கத் தடை நீட்டிப்பு

கன்னியாகுமரி மாவட்டத்தில் வடகிழக்குப் பருவமழை நீடிக்கும் நிலையில், பெருஞ்சாணி அணையின் நீா்மட்டம் 50 அடியைக் கடந்து அதிகரித்து வருகிறது.

மாவட்டத்தில் மழையின் காரணமாக ஏற்பட்டுள்ள சேதங்களைத் தடுக்கும் வகையிலான கண்காணிப்பு நடவடிக்கைகள் தீவிரப்படுத்தப்பட்டுள்ளன.

மழை காரணமாக அணைகளின் நீா்மட்டம் வேகமாக அதிகரித்து வருகிறது. மழை தொடங்குவற்கு முன்பாக 40 அடி என்ற அளவில் இருந்த பெருஞ்சாணி அணையின் நீா்மட்டம் திங்கள்கிழமை காலையில் 50.20 அடியாக அதிகரித்துக் காணப்பட்டது. 20 அடிக்கு குறைவாக இருந்த பேச்சிப்பாறை அணையின் நீா்மட்டம் 25.32 அடியாக அதிகரித்துக் காணப்பட்டது.

மாவட்டத்தில் திங்கள்கிழமை காலை 6 மணியுடன் நிறைவடைந்த 24 மணி நேரத்தில் அதிகபட்சமாக கொட்டாரத்தில் 78.80 மி.மீ. மழை பதிவானது. பேச்சிப்பாறை அணைக்கு விநாடிக்கு 1,430 கன அடி தண்ணீரும், பெருஞ்சாணி அணைக்கு விநாடிக்கு 1,104 கன அடி தண்ணீரும் வந்து கொண்டிருந்தது.

மாவட்டத்தின் பல்வேறு பகுதிகளில் திங்கள்கிழமை பகல் முழுவதும் மழை தணிந்தது. குலசேகரம் உள்ளிட்ட சில பகுதிகளில் மட்டும் சாரல் மழை பெய்தது.

மழையின் காரணமாக நீா்வரத்து அதிகமாக இருப்பதாலும், அதி கனமழைக்கான சிவப்பு நிற எச்சரிக்கை விடுக்கப்பட்டுள்ளதாலும், திற்பரப்பு அருவியில் 5ஆவது நாளாக சுற்றுலாப் பயணிகள் குளிக்க விதிக்கப்பட்டிருந்த தடை நீட்டிக்கப்பட்டது.