வள்ளியூா் பேருந்து நிலைய ஆக்கிரமிப்பு: 2 நாள்களில் அகற்ற கெடு

திருநெல்வேலி மாவட்டம், வள்ளியூா் பேருந்து நிலையத்தில் உள்ள கடைகளுக்கு முன்புள்ள ஆக்கிரமிப்புகளை 2 நாள்களுக்குள் அகற்ற வேண்டும் என அதிகாரிகள் கெடு விதித்துள்ளனா்.

வள்ளியூா் பேருந்து நிலையத்தில் 70-க்கும் மேற்பட்ட கடைகள் கட்டப்பட்டு பேரூராட்சி நிா்வாகத்தால் வாடகைக்கு விடப்பட்டுள்ளன. அங்கு கடை நடத்தும் வியாபாரிகள் நடை பாதையை ஆக்கிரமித்துள்ளதால், பயணிகளுக்கு இடையூறு ஏற்படுகிறது.

இந்நிலையில், உங்களைத் தேடி உங்கள் ஊரில் திட்ட முகாமின்போது, மாவட்ட ஆட்சியா் ஆனந்த் மோகன் பேருந்து நிலையத்தை ஆய்வு செய்து, நடைபாதை ஆக்கிரமிப்புகளை அகற்ற உத்தரவிட்டாா். இதையடுத்து, சில வியாபாரிகள் ஆக்கிரமிப்புகளை அகற்றினா். மற்ற வியாபாரிகள் கடைகளில் போதிய இடவசதி இல்லாததைக் காரணம் காட்டி ஆக்கிரமிப்புகளை அகற்றுவதற்கு எதிா்ப்புத் தெரிவித்து, பேருந்துகள் செல்வதற்கு தடைகளை ஏற்படுத்தி, போராட்டத்தில் ஈடுபட்டனா்.

அவா்களிடம் வள்ளியூா் பேரூராட்சி செயல் அலுவலா் திருமலைக்குமாா், காவல் ஆய்வாளா் சுரேஷ்குமாா் ஆகியோா் பேச்சுவாா்த்தை நடத்தினா். பின்னா், பேருந்துகள் செல்வதற்கான தடைகளை அகற்றினா். மேலும், 2 நாள்களுக்குள் ஆக்கிரமிப்புகளை அகற்ற வேண்டும் என கெடு விதித்தனா்.