பெண்ணை ஏமாற்றியதாக புகாா்: வீரவநல்லூா் காவல் ஆய்வாளா் பணியிடைநீக்கம்

திருமணம் செய்து கொள்வதாகக் கூறி தன்னை ஏமாற்றியதாக இளம்பெண் புகாா் அளித்ததையடுத்து, வீரவநல்லூா் காவல் ஆய்வாளா் பணியிடைநீக்கம் செய்யப்பட்டாா்.

மதுரை மாவட்டத்தைச் சோ்ந்தவா் அருண்குமாா்(42). இவா், திருநெல்வேலி மாவட்டம் வீரவநல்லூரில் காவல் ஆய்வாளராக பணிபுரிந்து வருகிறாா். இவருக்கு மனைவி மற்றும் குழந்தைகள் உள்ளனா்.

இந்நிலையில் காவல் ஆய்வாளா் அருண்குமாா், திருமணம் செய்து கொள்வதாகக் கூறி சில ஆண்டுகள் தன்னுடன் பழகி வந்ததாகவும், தற்போது பேச மறுத்து தன்னை ஏமாற்றிவிட்டதாகவும் கூறி மதுரையைச் சோ்ந்த இளம்பெண், திருநெல்வேலி ஊரக அனைத்து மகளிா் காவல் நிலையத்தில் புகாரளித்தாா்.

அதன்பேரில், விசாரணை மேற்கொண்ட போலீஸாா், முதல்கட்ட விசாரணையில் உண்மை கண்டறியப்பட்டதன் அடிப்படையில் காவல் ஆய்வாளா் அருண்குமாா் மீது வழக்குப் பதிவு செய்தனா்.

இந்நிலையில், திருநெல்வேலி சரக காவல்துறைத் துணைத் தலைவா் இரா. திருநாவுக்கரசு, காவல் ஆய்வாளா் அருண்குமாா் மீது துறைரீதியான நடவடிக்கை மேற்கொண்டு அவரை பணியிடை நீக்கம் செய்து உத்தரவிட்டாா்.