சாத்தான்குளம், உடன்குடியில் 2 நாள்கள் குடிநீர் நிறுத்தம்

ஸ்ரீவைகுண்டம் அருகே சனிக்கிழமை குடிநீர்க் குழாயில் உடைப்பு ஏற்பட்டுள்ளதால் சாத்தான்குளம், உடன்குடி பகுதிகளுக்கு 2 நாள்கள் குடிநீர் விநியோகம் இருக்காது என அறிவிக்கப்பட்டுள்ளது.

ஸ்ரீவைகுண்டம் பொன்னன்குறிச்சியில் இருந்து கூட்டுக் குடிநீர்த் திட்டம் மூலம் சாத்தான்குளம், உடன்குடி பகுதியில் உள்ள பேரூராட்சி மற்றும் கிராமங்களுக்கு குடிநீர் விநியோகிக்கப்பட்டு வருகிறது. இந்நிலையில் ஸ்ரீவைகுண்டம் அருகேயுள்ள கெட்டியம்மாள்புரம் சடையனேரி கால்வாயின் வடபுறமுள்ள குடிநீர்க் குழாயில் திடீரென உடைப்பு ஏற்பட்டுள்ளது. அந்த குழாயை சீரமைக்கும் பணியில் குடிநீர் வடிகால் வாரிய அலுவலர்கள் ஈடுபட்டுள்ளனர்.

எனவே ஞாயிறு,திங்கள்கிழமைகளில் சாத்தான்குளம், உடன்குடி பகுதிகளுக்கு குடிநீர் விநியோகம் நிறுத்தப்படும். அதுவரை கிடைக்கும் குடிநீரை பொதுமக்கள் சிக்கனமாகப் பயன்படுத்த வேண்டும் என குடிநீர் வடிகால் வாரிய அதிகாரிகள் தெரிவித்துள்ளனர்.