வடக்கு வண்டானம் புனித மிக்கேல் ஆலயத் திருவிழா: கொடியேற்றத்துடன் தொடக்கம்

கோவில்பட்டி அருகேயுள்ள வடக்கு வண்டானம் அதிதூதர் புனித மிக்கேல் ஆலயத் திருவிழா வெள்ளிக்கிழமை கொடியேற்றத்துடன் தொடங்கியது.

கொடியேற்றத்தை முன்னிட்டு வெள்ளிக்கிழமை இரவு 7 மணிக்கு காமநாயக்கன்பட்டி உதவி பங்குத்தந்தை ஜீவா ஆசீர்வதித்து கொடியேற்றினார். முன்னதாக புனித செபஸ்தியார் சப்பர பவனி நடைபெற்றது.

வண்டானம் ஆலய பங்குத்தந்தை சகாயதாசன், ஜீவா ஆகியோர் கூட்டுத் திருப்பலி, மறையுரையாற்றினர். நிகழ்ச்சியில் அச்சங்குளம், தீத்தாம்பட்டி, காமநாயக்கன்பட்டி, கோவில்பட்டி, தூத்துக்குடி, விருதுநகர், கடம்பூர், சிவகாசி ஆகிய பகுதிகளைச் சேர்ந்த திரளானோர் கலந்துகொண்டனர்.  ஏற்பாடுகளை ஆலய பங்குத்தந்தை சகாயதாசன், அருள்சகோதரிகள், ஊர்பெரியோர்கள், அன்பிய குழுக்கள் ஆகியோர் செய்திருந்தனர்.

கொடியேற்ற நிகழ்ச்சியைத் தொடர்ந்து 10 நாள்கள் இரவு 7 மணிக்கு ஜெபமாலை மன்றாட்டு திருப்பலி, மறையுரை நடைபெறும். அக்டோபர் 2ஆம் தேதி நவநாளான முதல் வெள்ளிக்கிழமையை முன்னிட்டு, புனித சவேரியார் ஆலயத்தில் சிறப்பு வழிபாடுகள் நடைபெறும்.

அக்டோபர் 4ஆம் தேதி காலையில் அலங்கரிக்கப்பட்ட சப்பரத்தில் புனித மிக்கேல் அதிதூதரின் திருவுருவம் முக்கிய வீதிகளில் பவனியாக எடுத்து வரப்படும்.