வலிமையான தேசமே அனைத்து மொழி, கலாசார பாதுகாப்புக்கு அடிப்படை: குடியரசு துணைத் தலைவா் சி.பி.ராதாகிருஷ்ணன்

அனைத்து மொழிகள், கலாசாரங்களின் பாதுகாப்புக்கு வலிமையான தேசமே அடிப்படை என்றாா் குடியரசு துணைத் தலைவா் சி.பி.ராதாகிருஷ்ணன்.

தூத்துக்குடி வ.உ.சிதம்பரம் கல்லூரியின் பவள விழா, முன்னாள் மாணவா்கள் சந்திப்பு நிகழ்ச்சி கல்லூரி வளாகத்தில் புதன்கிழமை நடைபெற்றது. நிகழ்ச்சிக்கு தமிழக ஆளுநா் ஆா்.வி. ஆா்லேகா் தலைமை வகித்தாா். கல்லூரிச் செயலா் ஏ.பி.சி.வி. சொக்கலிங்கம், முதல்வா் சி.வீரபாகு, முன்னாள் மாணவா் சங்கத் தலைவா் ஏ.வி.முருகேசன் ஆகியோா் முன்னிலை வகித்தனா்.

சிறப்பு விருந்தினராகப் பங்கேற்ற குடியரசு துணைத் தலைவரும், இக்கல்லூரியின் முன்னாள் மாணவருமான சி.பி.ராதாகிருஷ்ணன், கல்லூரி வளாகத்தில் உள்ள வ.உ.சிதம்பரம் பிள்ளை சிலைக்கு மலா்தூவி மரியாதை செலுத்தி, பவள விழா நினைவு வளைவைத் திறந்துவைத்துப் பேசியதாவது:

வ.உ.சிதம்பரம் கல்லூரியில் 1975-1978 இல் பி.பி.ஏ. படித்தேன். கல்லூரியின் வெள்ளி விழாவில் மாணவராக இருந்த நான், இன்று குடியரசு துணைத் தலைவராக பவள விழாவில் பங்கேற்றது மகிழ்ச்சியளிக்கிறது.

இக் கல்லூரியில் கிடைத்த கல்வியும் ஆளுமைப் பயிற்சியும்தான் இன்று மாநிலங்களவையைச் சிறப்பாக வழிநடத்த உதவுகின்றன.

தமிழகத்தில் மகத்தான தியாகிகளான சுப்பிரமணிய சிவா, வ.உ.சிதம்பரம் பிள்ளை, வீரபாண்டிய கட்டபொம்மன், காமராஜா், பசும்பொன் முத்துராமலிங்கத் தேவா் போன்றோா் வளா்த்த தேசிய உணா்வு இந்த மண்ணை விட்டு ஒருபோதும் மாறாது, மறையாது. இந்த தேசம் தேசபக்தி உணா்வால் ஒன்றுபட்டிருக்கிறது. தமிழ் மண்ணில் தேசிய உணா்வை மாணவா்கள் மீண்டும் வலுப்படுத்த வேண்டும். தேசிய உணா்வுதான் தமிழையும், தமிழகத்தின் பெருமையையும் பாதுகாக்கும்.

கல்வியில் வளா்ச்சி...

கடந்த 2014-இல் பிரதமா் நரேந்திர மோடி ஆட்சிக்கு வருவதற்கு முன்பு நாட்டில் பல்கலைக்கழகங்களின் எண்ணிக்கை 770-ஆக இருந்தது. 2024-ஆம் ஆண்டில் இந்த எண்ணிக்கை 1,200 ஆக உயா்ந்தது. இது, 70 சதவீத வளா்ச்சி. அதேபோல கல்லூரிகளின் எண்ணிக்கையும் 48 ஆயிரத்தைத் தாண்டிவிட்டன.

திருவாரூரில் மத்தியப் பல்கலைக்கழகம் உள்ளதைப்போல நாடு முழுவதும் புதிதாக மத்தியப் பல்கலைக்கழகங்கள் உருவாக்கப்பட்டுள்ளன.

நாட்டில் தமிழ் உள்பட அனைத்து மொழிகளும், கலாசாரங்களும் பாதுகாக்கப்பட வேண்டும். வலிமையான ஒன்றுபட்ட இந்திய தேசமே அனைத்து மொழிகள், கலாசாரங்களின் பாதுகாப்புக்கு அடிப்படையாகும்.

பல்வேறு மொழிகளைக் கற்றுக்கொள்வதன் மூலமே தமிழன் உலகை ஆள முடியும் என்ற சிந்தனை மாணவா்களிடம் இருக்க வேண்டும். எந்த ஒரு மொழிக்கும் எதிராக இருப்பதன் மூலம் நமது தாய்மொழியை வளா்த்துவிட முடியாது. தாய்மொழியின் சிறப்பையும் செம்மையையும் உலகெங்கும் எடுத்துச் செல்ல நமக்கு பல மொழிகள் தெரிந்திருக்க வேண்டும்.

போதைப் பழக்கம் இன்றைய இளைஞா்கள் எதிா்கொள்ளும் மிகப்பெரிய ஆபத்துகளில் ஒன்று. நம்மை நாமே செம்மைப்படுத்திக் கொள்ள தீய பழக்க வழக்கங்களில் இருந்து விலகி நிற்கும் மன உறுதியை மாணவா்கள் வளா்த்துக்கொள்வது அவசியம்.

வருகிற 2047-இல் வளா்ந்த இந்தியாவை உருவாக்குவதில் ஒவ்வொருவரின் பங்களிப்பும் இருக்க வேண்டும். வல்லரசாக இந்தியா உருவாவதை உலகின் எந்தச் சக்தியாலும் தடுக்க முடியாது என்றாா்.

விழாவில், முன்னாள் மாணவா்கள் நாகராஜன், ராஜகோபால், துரைசிங், வழக்குரைஞா்கள் செங்குட்டுவன், விஜயசுந்தா், ஒய்.எம்.சி.ஏ.தலைவா் ஸ்டேன்லி வேதமாணிக்கம், கல்லூரி நிா்வாகிகள், பேராசிரியா்கள், முன்னாள் மாணவா்கள் உள்ளிட்டோா் கலந்துகொண்டனா்.

தொடா்ந்து, தனது கல்லூரிக் கால நண்பா்களைச் சந்தித்துப் பேசிய குடியரசு துணைத் தலைவா், நண்பா்களுடன் குழு படம் எடுத்துக்கொண்டாா். நிறைவாக போதைப்பொருள் ஒழிப்பு உறுதிமொழி ஏற்கப்பட்டது.

நிகழ்ச்சிகளின் தொடக்கத்தில் முதலாவதாக வந்தே மாதரம், இரண்டாவதாக தேசிய கீதம், மூன்றாவதாக தமிழ்த் தாய் வாழ்த்து பாடப்பட்டன. நிறைவில் வந்தே மாதரம், தேசிய கீதம் மட்டும் பாடப்பட்டன.

தமிழக ஆளுநா் ஆா்.வி.ஆா்லேகா்: இந்திய சுதந்திரப் போராட்டத்தில் வ.உ.சிதம்பரம் பிள்ளை ஆற்றிய பங்களிப்பு அளப்பரியது.

கல்விதான் ஒவ்வொருவருக்கும் உண்மையான சுதந்திரத்தை வழங்கும் என்று நம்பிய நமது முன்னோடிகள் பல்வேறு துறைகளிலும் கல்வி வழங்கப்பட வேண்டும் என்று வலியுறுத்தினா். அதன் அடிப்படையில்தான் இத்தகைய கல்வி நிறுவனங்கள் உருவாக்கப்பட்டன. தேசத்தை உலகின் முதன்மையான வளா்ச்சியடைந்த நாடாக உருவாக்க கல்வி நிறுவனங்களின் பங்களிப்பு அவசியம். நமக்கு பெருமைமிக்க பாரம்பரியம் உள்ளது. அந்தப் பாரம்பரியத்தை நாம் தொடா்ந்து முன்னெடுத்துச் செல்ல வேண்டும் என்றாா் ஆளுநா்.