சாலை விபத்தில் இளைஞர் பலி!

தூத்துக்குடி-மதுரை புறவழிச் சாலையில் இருசக்கர வாகனம் மீது அடையாளம் தெரியாத வாகனம் மோதியதில் இளைஞா் உயிரிழந்தாா்.

தூத்துக்குடி, சோட்டையன் தோப்பு, பிள்ளையாா் கோயில் தெருவைச் சோ்ந்த சதீஷ்குமாா் மகன் மணிகண்டன் (31). கட்டடத் தொழிலாளி. இவருக்கு கலைவேணி (26) என்ற மனைவி, 6 வயது மகள் உள்ளனா்.

இவரது மனைவி பி. சுப்பிரமணியபுரத்தில் உள்ள தனது பெற்றோா் வீட்டில் தங்கியிருந்த நிலையில், அவரை அழைத்து வருவதற்காக மணிகண்டன் வெள்ளிக்கிழமை வேலை முடிந்து இருசக்கர வாகனத்தில் வாலசமுத்திரம் நோக்கிச் சென்றாராம்.

வாலசமுத்திரம் பேருந்து நிறுத்தம் அருகே சென்றபோது, பின்னால் வந்த அடையாளம் தெரியாத வாகனம் மோதிவிட்டு நிற்காமல் சென்றது. இதில் மணிகண்டன் நிகழ்விடத்திலேயே உயிரிழந்தாா்.

ஓட்டப்பிடாரம் போலீஸாா் அவரது உடலைக் கைப்பற்றி கூறாய்வுக்காக அரசு மருத்துவமனைக்கு அனுப்பி வைத்தனா். மேலும், விபத்தை ஏற்படுத்திவிட்டுத் தப்பிய வாகனம் குறித்து வழக்குப் பதிவு செய்து, விசாரித்து வருகின்றனா்.