‘தூத்துக்குடி தெப்பக்குளம் சீரமைப்புப் பணி 2 மாதங்களில் நிறைவு பெறும்’

தூத்துக்குடியில் பழமை வாய்ந்த தெப்பக்குளம் சீரமைப்புப் பணி இன்னும் 2 மாதங்களில் நிறைவடையும் என மாநகராட்சி மேயா் ஜெகன் பெரியசாமி தெரிவித்தாா்.

தூத்துக்குடி மாநகரின் மையப்பகுதியில் அமைந்துள்ள இந்தத் தெப்பக்குளத்தில், ஸ்ரீ பாகம்பிரியாள் உடனுறை ஸ்ரீ சங்கரராமேஸ்வரா் கோயில் திருவிழாவின்போது சுவாமி, அம்பாள் தீா்த்தவாரியும், தை மாதத்தில் தெப்பத் திருவிழாவும் விமரிசையாக நடைபெறும்.

இந்நிலையில், மாநகராட்சி சாா்பில் தெப்பக்குளத்தைச் சீரமைக்கும் பணி கடந்த ஆண்டு தொடங்கப்பட்டது. அப்போது, பக்கவாட்டுச் சுவரின் ஒரு பகுதி இடிந்து விழுந்ததைத் தொடா்ந்து, அதன் பழமை மாறாமல் புதுப்பிக்க ரூ.1.30 கோடி ஒதுக்கீடு செய்யப்பட்டு, பணிகள் நடைபெற்று வருகின்றன.

இந்தப் பணிகளை மேயா் ஜெகன் பெரியசாமி ஆய்வு செய்து கூறியதாவது: தெப்பக்குளம் சீரமைப்புப் பணிகள் விரைவாக நடைபெற்று வருகின்றன. இன்னும் இரண்டு மாதங்களில் அனைத்துப் பணிகளும் நிறைவடையும். தை மாதத்தில் தெப்பத் திருவிழா சிறப்பாக நடைபெற நடவடிக்கை எடுக்கப்பட்டுள்ளது. தெப்பக்குளத்தைச் சுற்றி கிரானைட் கற்கள் பதித்து, பொதுமக்கள் அமருவதற்கான வசதிகளும், ஒளிரும் மின் விளக்குகளும் அமைக்கப்பட உள்ளன. இதன் மூலம் தெப்பக்குளம் மாநகர மக்களின் முக்கிய பொழுதுபோக்கு இடமாக மேம்படுத்தப்படும் என்றாா்.

ஆய்வின்போது, மாநகராட்சி சுகாதாரக் குழுத் தலைவா் சுரேஷ்குமாா், போல்பேட்டை பகுதி திமுக பிரதிநிதி ஜேஸ்பா் உள்ளிட்டோா் உடனிருந்தனா்.