குண்டா் சட்டத்தில் இளைஞர் கைது

தூத்துக்குடியில் நாட்டு வெடிகுண்டு தயாரித்து வெடிக்கச் செய்து, அதை விடியோவாக பதிவு செய்து சமூக வலைதளங்களில் பதிவிட்ட இளைஞா் குண்டா் தடுப்புச் சட்டத்தில் சிறையில் அடைக்கப்பட்டாா்.

தூத்துக்குடி லெவிஞ்சிபுரத்தைச் சோ்ந்தவா் அலெக்ஸ் (22). இவா், தனது பிறந்தநாள் கொண்டாட்டத்தின்போது, அமுதா நகரைச் சோ்ந்த பிரகாஷ் (23), சுடலை காலனியைச் சோ்ந்த குரு (21) ஆகியோருடன் சோ்ந்து நாட்டு வெடிகுண்டு தயாரித்து, திறந்தவெளியில் வெடிக்கச் செய்தாா். மேலும், அந்த விடியோவாக பதிவுசெய்து, சமூகவலை தளங்களில் பதிவிட்டாராம். போலீஸாா் வழக்குப் பதிந்து, 3 பேரையும் கைது செய்து சிறையில் அடைத்தனா்.

இந்நிலையில், பொதுமக்களுக்கும் பொது அமைதிக்கும் குந்தகம் விளைவிக்கும் வகையில் செயல்படும் அலெக்ஸை குண்டா் தடுப்புச் சட்டத்தில் கைது செய்ய மாவட்ட காவல் கண்காணிப்பாளா் இரா. சிவபிரசாத் பரிந்துரைத்தாா். அதையேற்று, ஆட்சியா் விஷு மகாஜன் உத்தரவிட்டதன்பேரில், பாளையங்கோட்டை மத்திய சிறையில் உள்ள அலெக்ஸிடம் அதற்கான உத்தரவு நகல்களை போலீஸாா் வழங்கினா்.