தா.பழூரில் 1445 குடும்பங்களுக்கு விலையில்லா பொருள்கள்

அரியலூர் மாவட்டம், தா.பழூர் அரசு மேல்நிலைப் பள்ளியில் தமிழக முதல்வரின் சிறப்பு திட்டத்தின்கீழ், 1,445 குடும்பங்களுக்கு விலையில்லா மின்விசிறி, மிக்ஸி, கிரைண்டர் வழங்கும் விழா ஞாயிற்றுக்கிழமை நடைபெற்றது.

விலையில்லா பொருள்களை பயனாளிகளுக்கு வழங்கி சிதம்பரம் மக்களவை உறுப்பினர் மா. சந்திரகாசி பேசுகையில், விலையில்லா பொருட்களைப் பெறும் பெண்கள் தங்கள் பள்ளி வயது குழந்தைகளை கட்டாயமாக பள்ளிக்கு அனுப்பி கல்வி கற்கச் செய்ய வேண்டும். கல்வியில் சிறந்து விளங்கினால்தான் சாதி வேறுபாடு அற்ற சமுதாயத்தை உருவாக்க முடியும் என்றார் அவர்.

நிகழ்ச்சியில், அரியலூர் மாவட்ட பால் உற்பத்தியாளர்கள் கூட்டுறவு சங்கத் தலைவர் தாமரை. எஸ். ராஜேந்திரன், மாவட்ட ஊராட்சி உறுப்பினர் குமார், ஊராட்சித் தலைவர் மஞ்சுகுமார், சிறப்பு திட்ட தனி துணை ஆட்சியர் ஜெகநாதன், ஜயங்கொண்டம் வட்டாட்சியர் ஸ்ரீதரன் உள்ளிட்டோர் பங்கேற்றனர்.