போக்ஸோ சட்டத்தில் விசிக பிரமுகா் கைது

அரியலூா் அருகே 13 வயதுச் சிறுமி குளிப்பதை விடியோ எடுத்த விசிக பிரமுகா் போக்ஸோ சட்டத்தில் ஞாயிற்றுக்கிழமை கைது செய்யப்பட்டாா்.

அரியலூரை அடுத்த கோவிந்தபுரம் பகுதியைச் சோ்ந்தவா் பூமிநாதன் (48). விசிக பிரமுகரான இவா் 13 வயதுச் சிறுமி குளிப்பதை மறைந்திருந்து கைப்பேசியில் விடியோ எடுத்தாா்.

இதைக் கண்ட சிறுமியின் தாயாா், அவரைத் தடுத்து நிறுத்தி, தனது மகளை வீட்டுக்குள் அழைத்துச் சென்றாா். பின்னா், பூமிநாதனிடம் சென்று சிறுமியை விடியோ எடுத்தது குறித்துக் கேட்டாா்.

அப்போது பூமிநாதன் தான் விடியோ எடுத்ததை ஒப்புக்கொண்டு, சிறுமியின் தாயிடம் வாக்குவாதத்தில் ஈடுபட்டாா். பூமிநாதனின் மனைவி சுப்புலட்சுமியும் அவரை திட்டி பேசி, விடியோவை இணையத்தில் பதிவேற்றி விடுவதாக மிரட்டினாா்.

இதையடுத்து சிறுமியின் தாய் 1091 என்ற உதவி எண்ணைத் தொடா்புகொண்டு அளித்த புகாரின்பேரில் விசாரித்த அரியலூா் அனைத்து மகளிா் காவல் நிலைய ஆய்வாளா் நளினி தலைமையிலான காவல் துறையினா், பூமிநாதனை போக்ஸோ சட்டத்தில் ஞாயிற்றுக்கிழமை கைது செய்து சிறையில் அடைத்தனா்.