பெருந்தலைவா் காமராஜா் காலை உணவுத் திட்ட விரிவாக்கம்: அரியலூா் மாவட்டத்தில் 18,161 மாணவா்கள் பயன்

அரியலூா் மாவட்டத்தில், பெருந்தலைவா் காமராஜா் காலை உணவுத் திட்ட விரிவாக்கம் செவ்வாய்க்கிழமை தொடங்கிவைக்கப்பட்டது. இதன் மூலம், 241 பள்ளிகளில் 6 முதல் 8 ஆம் வகுப்பு வரை பயிலும் 18,161 மாணவ, மாணவிகள் பயன் பெறுவா்.

சென்னையில் இந்தத் திட்டத்தை முதல்வா் ஜோசப்விஜய் செவ்வாய்க்கிழமை தொடங்கிவைத்து

மாணவா்களுக்கு காலை உணவை வழங்கினாா். இதன் காணொலி காட்சி, அரியலூா் அஸ்தினாபுரம் அரசு மாதிரி மேல்நிலைப் பள்ளியில் ஒளிபரப்பு செய்யப்பட்டது.

இந்நிகழ்வை பாா்வையிட்ட ஆட்சியா் ந. மிருணாளினி, தொடா்ந்து திட்டத்தை தொடங்கிவைத்து மாணவ, மாணவிகளுக்கு காலை உணவை வழங்கி அவா்களுடன் அமா்ந்து உணவருந்தினாா்.

இந்நிகழ்ச்சியில் சட்டப் பேரவை உறுப்பினா் தாமரை எஸ். ராஜேந்திரன், மகளிா் திட்ட இயக்குநா் சு. தேன்ராஜ், மாவட்ட முதன்மை கல்வி அலுவலா் ரேணுகோபால், அரியலூா் வருவாய் கோட்டாட்சியா் த.பிரேமி மற்றும் ஆசிரியா்கள், பள்ளி மாணவ, மாணவிகள் உள்ளிட்டோா் கலந்து கொண்டனா்.

இந்தத் திட்டத்தில், அரியலூா் மாவட்டத்தில் ஊரகப் பகுதிகளில் 218 அரசுப் பள்ளிகள், 17 அரசு உதவிப்பெறும் பள்ளிகள் மற்றும் பேரூராட்சிப் பகுதிகளில் 3 அரசுப் பள்ளிகள், 3 அரசு உதவி பெறும் பள்ளிகள் என மொத்தம் 241 பள்ளிகளில் 6 முதல் 8 ஆம் வகுப்பு வரை பயிலும் 18,161 மாணவ, மாணவிகள் பயன்பெறுகின்றனா்.

இத்திட்டத்துக்காக, ரூ. 37,02,900 நிதி ஒதுக்கீடு பெறப்பட்டு, கொள்முதல் குழு அலுவலா்களால் விலை நிா்ணயம் செய்யப்பட்டு கூடுதல் பாத்திரங்கள் மற்றும் உபகரணங்கள் கொள்முதல் செய்யப்பட்டுள்ளன . மேலும், ரூ. 8,57,025 நிதி ஒதுக்கீட்டில் புதிதாக 117 பள்ளிகளுக்கான எரிவாயு இணைப்புகளும் பெறப்பட்டுள்ளன.

இத்திட்டத்தின் கீழ் மாணவா்களுக்கு வாரந்தோறும் திங்கள்கிழமை வெண் பொங்கல் மற்றும் காய்கறி சாம்பாா், செவ்வாய்கிழமை கோதுமை ரவா கிச்சடி மற்றும் காய்கறி சாம்பாா், புதன்கிழமை வெண்பொங்கல் மற்றும் காய்கறி சாம்பாா், வியாழக்கிழமை ரவா உப்புமா மற்றும் காய்கறி சாம்பாா், வெள்ளிக்கிழமை சேமியா கிச்சடி மற்றும் காய்கறி சாம்பாா் ஆகியவை காலை உணவாக வழங்கப்படுகிறது.