செப். 28-ல் கிராம உதவியாளர்கள் பணியிடங்களுக்கு நேர்காணல்

பெரம்பலூர் மாவட்டம், குன்னம் வட்டத்தில் காலியாக உள்ள 3 கிராம உதவியாளர்கள் பணியிடங்களுக்கு செப். 28 அன்று குன்னம் வட்டாட்சியர் அலுவலகத்தில் நேர்காணல் நடைபெற உள்ளது.

மேற்கண்ட பணியிடத்துக்கு தகுதியான நபர்களிடமிருந்து விண்ணப்பங்கள் வரவேற்கப்படுகின்றன. கல்வித்தகுதி: 5 ஆம் வகுப்பு தேர்ச்சி பெற்று, தமிழில் எழுத, படிக்க தெரிந்திருக்க வேண்டும். 21 வயது முதல் 30 வயதுக்குள்பட்டவராகவும், அட்டவணை வகுப்பினர் எனில் 35 வயதுக்குள்ளும், பிற்படுத்தப்பட்டோர், மி.பி மற்றும் சீர்மரபினர் எனில் 35 வயதுக்குள்பட்டவராகவும் இருத்தல் வேண்டும். மிதிவண்டி ஓட்டத் தெரிந்திருக்க வேண்டும்.

நன்னடத்தை சான்று மற்றும் உடல் தகுதி சான்று சமர்பிப்பதோடு, வேலைவாய்ப்பு அலுவலகத்தில் பதிவு செய்திருக்க வேண்டும். இத்தகுதியுடைய நபர்கள் தங்களது அசல் சான்று ஆவணங்களுடன், 2 சான்றொப்பம் இடப்பட்ட நகல்களுடன் நேர்காணலில் பங்கேற்கலாம் என

குன்னம் வட்டாட்சியர் அலுவலகம் சார்பில் வெளியிடப்பட்டுள்ள செய்திக்குறிப்பில் தெரிவிக்கப்பட்டுள்ளது.