களரம்பட்டியில் தூய்மை இந்தியா விழிப்புணர்வுப் பேரணி

பெரம்பலூர் அருகேயுள்ள களரம்பட்டி அரசு ஆதி திராவிடர் நல மேல்நிலைப் பள்ளியில், இளையோர் செஞ்சிலுவை சங்கம் சார்பில் ஜெனீவா தினம் மற்றும் தூய்மை இந்தியா விழிப்புணர்வுப் பேரணி புதன்கிழமை நடைபெற்றது.
பேரணியை கொடியசைத்து தொடக்கி வைத்தார் பள்ளித் தலைமை ஆசிரியர் சுப்பிரமணியன். உதவித் தலைமை ஆசிரியர் சாலமன் முன்னிலையில் நடைபெற்ற பேரணியில் பங்கேற்ற மாணவ, மாணவிகள், கழிப்பறை பயன்பாடு, தனி நபர் சுத்தம், மனிதநேயம் காத்தல், தீவிரவாதம் ஒழித்தல், சகோதரத்துவம் பேணுதல் உள்ளிட்ட பல்வேறு விழிப்புணர்வு பதாகைகளைக் கையில் ஏந்தி முழக்கமிட்டுச் சென்றனர். 
பள்ளி வளாகத்தில் தொடங்கிய இந்த விழிப்புணர்வுப் பேரணி, கிராமத்தின் பிரதான வீதிகள் வழியே சென்று, மீண்டும் பள்ளி வளாகத்தில் நிறைவடைந்தது. 
தொடர்ந்து, பள்ளி வளாகத்தில் மரக்கன்றுகள் நடப்பட்டன. பின்னர், ஆசிரியர் தினத்தை முன்னிட்டு பள்ளி மாணவர்கள் தங்களது ஆசிரியர்களுக்கு வாழ்த்து தெரிவித்தனர். மேலும், ஆசிரியர்களுக்கு பரிசுகளும் வழங்கப்பட்டன.
நிகழ்ச்சிகளில், பள்ளி ஆசிரியர்கள் புவனேஸ்வரி, செந்தில்குமார், சுதாகர், ஜெபக்குமார், தம்புசாமி, ராஜேந்திரன், கவிதா, ஜெயந்தி, இளையோர் செஞ்திலுவை சங்கம் மற்றும் சாரண சாரணியர் இயக்கத்தைச் சேர்ந்த மாணவ, மாணவிகள் கலந்து கொண்டனர். இளையோர் செஞ்சிலுவை சங்க மாவட்ட இணைக் கன்வீனர் முனைவர் த. மாயக்கிருஷ்ணன் நன்றி கூறினார்.