மாவட்ட விளையாட்டுப் போட்டிகள்: 561 பேர் பங்கேற்பு

தஞ்சாவூர் அன்னை சத்யா விளையாட்டரங்கத்தில் மாவட்ட அளவிலான மாதாந்திர விளையாட்டுப் போட்டிகள் புதன்கிழமை நடைபெற்றன.
இப்போட்டிகளைக் கலை, பண்பாட்டுத் துறை இணை இயக்குநர் இரா. குணசேகரன் தொடங்கி வைத்தார். இதில், தடகளம், கூடைப்பந்து, கோ - கோ, நீச்சல் ஆகிய போட்டிகள் நடைபெற்றன. இவற்றில் தடகளத்தில் 110 மாணவர்களும், 80 மாணவிகளும், நீச்சல் போட்டியில் 35 ஆண்களும், 24 பெண்களும் கலந்து கொண்டனர். மேலும், கூடைப்பந்து போட்டியில் 8 ஆண்களும் அணிகளும், 4 பெண்கள் அணிகளும், கோ - கோ போட்டியில் 8 ஆண்கள் அணிகளும், 6 பெண்கள் அணிகளும் பங்கேற்றன. இப்போட்டிகளில் மொத்தம் 561 பேர் பங்கேற்று விளையாடினர். இந்நிகழ்ச்சியில் மாவட்ட விளையாட்டு அலுவலர் க. பாபு,  மாவட்ட உடற்கல்வி ஆய்வாளர் மு. தேன்மதி,  மாவட்ட பளுதூக்குதல் பயிற்றுநர் து. செந்தில்குமார் உள்ளிட்டோர் கலந்து கொண்டனர்.