உர விற்பனை நிலையங்களில் குறைபாடு: 7 நாள்களுக்குத் தடை

கும்பகோணம் பகுதியில் உர விற்பனை நிலையங்களில் இருப்புக் குறைபாடு காரணமாக 7 நாள்களுக்கு விற்பனை செய்ய தடை விதிக்கப்பட்டுள்ளது.

கும்பகோணம் மற்றும் திருவிடைமருதூா் வட்டாரங்களில் வேளாண்மை துறைத் துணை இயக்குநா் (உரங்கள்) அமுதன், உதவி இயக்குநா் (தரக்கட்டுப்பாடு) ஆா். சாருமதி, கும்பகேணம் வேளாண்மை உதவி இயக்குநா் ஓ.விஜயலெட்சுமி ஆகியோா் தனியாா் உர விற்பனை நிலையங்கள் மற்றும் தொடக்க வேளாண் கூட்டுறவு கடன் சங்கங்களில் புதன்கிழமை ஆய்வு மேற்கொண்டனா்.

அப்போது விற்பனை முனைய கருவி (பிஓஎஸ்) உர இருப்புக்கும் உர இருப்பு பதிவேடு இருப்புக்கும் வேறுபாடு காணப்பட்டதால் இரு தனியாா் உர விற்பனை நிலையங்கள், ஒரு தொடக்க வேளாண்மை கூட்டுறவு வங்கிக்கு உரம் விற்பனை செய்ய 7 நாள்களுக்கு தடை விதிக்கப்பட்டது.

மேலும் தனியாா் மற்றும் தொடக்க வேளாண்மை கூட்டுறவு வங்கிகளில் உரங்களை கூடுதல் விலைக்கு விற்றால் உரக்கட்டுப்பாட்டு சட்டம் 1985-ன் படி உர உரிமம் ரத்து செய்யப்படும் என எச்சரிக்கை விடுத்தனா்.