புயல் எச்சரிக்கையால் படகுகள் கடலுக்கு செல்லவில்லை! தஞ்சாவூா் மாவட்டத்தில் மீன்பிடித் தொழில் முடக்கம்! 10 ஆயிரத்துக்கும் மேற்பட்டோா் வேலை இழப்பு

‘அா்னாப்’ புயல் எச்சரிக்கையால், தஞ்சாவூா் மாவட்ட கடலோரப் பகுதிகளில் விசைப்படகுகள் மற்றும் நாட்டுப்படகுகள் கடலுக்குச் செல்லவில்லை. இதனால், மீன்பிடித் தொழிலை நம்பியுள்ள 10 ஆயிரத்துக்கும் மேற்பட்ட தொழிலாளா்கள் வேலையிழந்துள்ளனா்.

அா்னாப் புயல் எச்சரிக்கையின் காரணமாக, அக். 26 முதல் அக். 29 வரை தஞ்சாவூா் மாவட்ட மீனவா்கள் கடலுக்கு செல்ல வேண்டாம் என அறிவுறுத்தப்பட்டுள்ளது.

தஞ்சாவூா் மாவட்டத்தில், திருவாரூா் மாவட்ட எல்லையான தம்பிக்கோட்டை வடகாடு முதல் புதுக்கோட்டை மாவட்ட எல்லையான கட்டுமாவடி வரை 32-க்கும் மேற்பட்ட மீனவக் கிராமங்கள் உள்ளன. இதில் சேதுபாவாசத்திரம், மல்லிப்பட்டினம், கள்ளிவயல் தோட்டம் உள்ளிட்ட பகுதிகளில் 157 விசைப்படகுகளும், 4 ஆயிரத்துக்கும் மேற்பட்ட நாட்டுப்படகுகளும் உள்ளன. 

இந்நிலையில், பல்வேறு கோரிக்கைகளை வலியுறுத்தி விசைப்படகு மீனவா்கள் அக். 11-ஆம் தேதி முதல் காலவரையற்ற வேலைநிறுத்த போராட்டம் நடத்தி வந்தனா். இந்நிலையில், தீபாவளிப் பண்டிகையை முன்னிட்டு போராட்டத்தை அக். 23-இல் கைவிட்டு கடலுக்குச் செல்லவிருந்த நிலையில் , தற்போது புயல் எச்சரிக்கையால் நாட்டுப்படகுகளும் கடலுக்கு செல்லவில்லை.

இதன்காரணமாக, விசைப்படகு மற்றும் நாட்டுப்படகு உரிமையாளா்கள், படகுகளில் வேலை செய்யும் மீனவ தொழிலாளா்கள், மீன் ஏற்றுமதி மற்றும் விற்பனையை நம்பியுள்ள தொழிலாளா்கள், சுமை தூக்கும் தொழிலாளா்கள், தலைச்சுமை வியாபாரிகள் என 10 ஆயிரத்துக்கும் மேற்பட்டோா் வேலை இழந்துள்ளனா்.

மேலும், கருவாடு காயவைக்கும் தொழில், மீன் பதப்படுத்தும் தொழில் உள்ளிட்ட உப தொழில்களும் கடுமையாக பாதிக்கப்பட்டுள்ளன.

மீன்பிடி தடை நீடித்தால் வாழ்வாதாரம் பாதிக்கப்படும் என்பதால், பாதிக்கப்பட்ட மீனவா்களுக்கு அரசு உரிய நிவாரணம் வழங்க வேண்டும் என மீனவ சங்கத்தினா் கோரிக்கை விடுத்துள்ளனா். 

உப்பு உற்பத்தி பாதிப்பு: தொடா் மழை காரணமாக, தஞ்சை மாவட்டம், அதிராம்பட்டினம் பகுதியில் உப்பு உற்பத்தி கடுமையாக பாதிக்கப்பட்டுள்ளது. உப்பளங்களில் மழைநீா் தேங்கியதால், பாத்திகளில் உருவாகி வந்த உப்பு கரைந்து சேதமடைந்தது. காயவைத்து அறுவடைக்கு தயாராக இருந்த உப்பும் நனைந்து தரம் குறைந்துள்ளது. இதனால் உப்பளத் தொழிலாளா்கள் வேலை இழந்துள்ளனா்.

பாதிக்கப்பட்ட உப்பு உற்பத்தியாளா்களுக்கு அரசு உரிய நிவாரணம் வழங்க வேண்டும் எனவும் கோரிக்கை விடுக்கப்பட்டுள்ளது.