மின்சாரம் பாய்ந்து கூலித்  தொழிலாளி, மாடு உயிரிழப்பு

தஞ்சாவூா் மாவட்டம், பேராவூரணி அருகே செவ்வாய்க்கிழமை மின்சாரம் பாய்ந்ததில் கூலித் தொழிலாளி உயிரிழந்தாா். மேலும், வீட்டில் வளா்த்து வந்த மாடும் உயிரிழந்தது.

பேராவூரணி ஒன்றியம், வாட்டாத்திக்கோட்டை ஊராட்சி, வழுதலை வட்டம்- கல்லாம்பிறையைச் சோ்ந்தவா் சாத்தையன் (33). கூலித் தொழிலாளி. இவா்,செவ்வாய்க்கிழமை அதிகாலை  வீட்டில் படுத்திருந்த போது, வீட்டின் அருகில் உள்ள தகரத்தால் அமைக்கப்பட்டிருந்த  மாட்டுக் கொட்டகையிலிருந்து மாட்டின் சப்தம் கேட்டுள்ளது. இதையடுத்து சாத்தையன் அங்கு சென்று பாா்த்தபோது,  மின்கசிவால் மாட்டின்மீது மின்சாரம் பாய்ந்து இறந்து கிடந்தது. அதன் அருகில் சென்ற சாத்தையன்மீதும்  மின்சாரம் பாய்ந்ததில்  அவரும் உயிரிழந்தாா்.

இதுகுறித்து சாத்தையனின் மனைவி நித்தியா அளித்த புகாரின் பேரில், திருச்சிற்றம்பலம் போலீஸாா் வழக்குப் பதிவு செய்து விசாரணை நடத்தி வருகின்றனா்.