பெட்ரோல் விற்பனை நிலையத்தில் ரூ.2.5 லட்சம் திருட்டு

திருச்சி பஞ்சப்பூர் அருகே பெட்ரோல் விற்பனை நிலையத்தில் (பங்க்) வெள்ளிக்கிழமை இரவு ரூ. 2.5 லட்சம் ரொக்கம் திருடு போனது குறித்து  போலீஸார் விசாரித்து வருகின்றனர்.

திருவானைக்கா மகாலட்சுமி நகரைச் சேர்ந்தவர் ஜாபர் மகன் யாசீர் (28). பஞ்சப்பூரில் பெட்ரோல் பங்க் நடத்தி வருகிறார்.

வெள்ளிக்கிழமை வசூலான ரூ. 2.50 லட்சம் ரொக்கத்தை பங்க் ஊழியர்கள் பீரோவில் வைத்துவிட்டு தூங்கியுள்ளனர்.

சனிக்கிழமை அதிகாலை எழுந்து பார்த்த போது, பீரோ உடைக்கப்பட்டு உள்ளே இருந்த ரூ. 2.50 லட்சம் ரொக்கம் திருட்டு போயிருப்பதும், கடந்த சில நாட்களாக அங்கு தங்கியிருந்து பங்கு வர்த்தகத்தில்  ஈடுபட்டு வந்த யாசீரின் நண்பர் விருதாசலத்தைச் சேர்ந்த சுதாகர் என்பவர் காணாமல் போயிருப்பதும் தெரியவந்தது. இதுகுறித்து எடமலைப்பட்டிபுதூர் போலீஸார் வழக்குப் பதிந்து விசாரிக்கின்றனர்.