அதிமுக பிரமுகரைத் தாக்கிய காவல் ஆய்வாளர் காத்திருப்போர் பட்டியலுக்கு மாற்றம்

திருச்சி மாவட்டம், மணப்பாறையில் அதிமுக பிரமுகரைத் தாக்கிய புகாரில் காவல் ஆய்வாளர் கென்னடி  காத்திருப்போர் பட்டியலுக்கு மாற்றப்பட்டார். இதற்கான உத்தரவை திருச்சி சரக டி.ஐ.ஜி. லலிதா லட்சுமி பிறப்பித்துள்ளார்.
திருச்சி மாவட்டம்,  மணப்பாறையைச் சேர்ந்தவர் பி.வி.கே. பழனிசாமி.   
மாவட்ட ஊராட்சியின் முன்னாள் உறுப்பினரான இவர், செவ்வாய்க்கிழமை இரவு மணப்பாறை காவல் நிலையத்துக்கு வந்த போது அவருக்கும்,  காவல் ஆய்வாளர் கென்னடிக்கும் இடையே வாக்குவாதம் ஏற்பட்டது.  இதைத் தொடர்ந்து பழனிசாமியை கென்னடி தாக்கியதாகக் கூறப்படுகிறது. இதன் பின்னர், காவல் நிலையத்துக்கு வெளியே அதிமுகவினர் தர்னாவிலும் ஈடுபட்டனர்.
இந்த பிரச்னையைத் தொடர்ந்து, நடைபெற்ற சம்பவம் குறித்து மாவட்டக் காவல் கண்காணிப்பாளர் ஜியாவுல்ஹக் மூலமாக தகவல்களைப் பெற்ற திருச்சி சரக டி.ஐ.ஜி. ஆர். லலிதா லட்சுமி,  மணப்பாறை காவல் ஆய்வாளர் கென்னடியை காத்திருப்போர் பட்டியலுக்கு மாற்றி புதன்கிழமை உத்தரவிட்டார்.