வீடுகளில் பெறப்படும் குப்பைகளை கண்காணிக்க க்யூ.ஆர் கோடு அறிமுகம்

திருச்சி மாநகராட்சியில் தினமும் வீடுகளில் பெறப்படும் குப்பைகளைக் கண்காணிப்பதற்காக க்யூ.ஆர். கோடு தொழில்நுட்பம் அறிமுகம் செய்யப்பட்டுள்ளது.
திருச்சி மாநகராட்சியின் கோ- அபிஷேகபுரம் கோட்டத்தில், 56 ஆவது வார்டுக்குள்பட்ட தில்லைநகர் 11 ஆவது குறுக்குத் தெரு,  ஏஆர்ஏ,  என்.வி.வி. குயின்மிஸ்ட், வித்தியா, மாருதி வில்லா,  ஏ.பி.பி. உள்ளிட்ட அடுக்குமாடி குடியிருப்புப் பகுதி மக்களிடம் மாநகராட்சி ஆணையர் ந.ரவிச்சந்திரன் புதன்கிழமை இந்த தொழில்நுட்பத்தை அறிமுகப்படுத்தினார்.
இதைத் தொடர்ந்து அவர் கூறியது: மாநகராட்சிக்குள்பட்ட அனைத்து வார்டுகளிலுள்ள வீடுகளுக்கு விரைவில் தனி க்யூ.ஆர். கோடு திட்டம் அறிமுகப்படுத்தப்படும். ஒவ்வொரு வீடு, வணிக நிறுவனங்கள், அடுக்குமாடிக் குடியிருப்புகள் அனைத்துக்கும் தனியாக க்யூ.ஆர்.கோடு வழங்கப்படும்.
குப்பைகள் பெறும் வாகனங்களில் வரும் தூய்மைப் பணியாளர்கள் குப்பைகளை வீடுகளில் உள்ள க்யூஆர்.கோடு பதிவை ஆண்ட்ராய்டு செல்லிடப்பேசியில் பதிவு செய்தால் உடனடியாக மாநகராட்சி கணினிக்கு குப்பை சேகரித்த நேரம் பதிவாகிவிடும். மக்கும் குப்பைகள், மக்காத குப்பைகள் என பிரித்து வழங்கப்படுகிறதா என்ற விவரம் திட்டத்தின் மூலம் வீடுகள், நிறுவனங்களிடமிருந்து தினசரி பெறப்படும். குப்பைகள் வாங்கும் பணி செம்மையாக்கப்படும் என்றார்  ஆணையர் ந. ரவிச்சந்திரன். நிகழ்வில், மாநகராட்சி உதவி ஆணையர்கள் பிரபாகரன், தயாநிதி, உதவிச் செயற்பொறியாளர் ரவீந்திரன், சுகாதார அலுவலர் தலைவிரிச்சான் உள்ளிட்டோர் பங்கேற்றனர்.