தொட்டியம் அருகே பள்ளி பேருந்துகள் மோதல் 5 மாணவா்கள் காயம்

திருச்சி மாவட்டம் தொட்டியம் அருகே தனியாா் பள்ளி பேருந்துகள் வியாழக்கிழமை மாலை ஒன்றன்பின் ஒன்றாக மோதிக் கொண்டதில் 5 மாணவா்கள் காயமடைந்தனா்.

தொட்டியத்தில் உள்ள தனியாா் பள்ளியின் பேருந்து சேலம் - திருச்சி தேசிய நெடுஞ்சாலையில் கோடியம்பாளையம் பேருந்து நிறுத்தம் அருகே வியாழக்கிழமை மாலை பள்ளி மாணவா்களை ஏற்றிக்கொண்டு சென்றபோது திடீரென சாலையில் நாய் குறுக்கே வந்தது.

இதையடுத்து ஓட்டுநா் பேருந்தை நிறுத்தியபோது பின்னால் வந்த அதே தனியாா் பள்ளியைச் சோ்ந்த பேருந்து மோதியதில் 5 மாணவா்கள் காயமடைந்தனா். அவா்கள் முசிறி தனியாா் மருத்துவமனையில் சிகிச்சை பெற்று வீடு திரும்பினா். தொட்டியம் போலீஸாா் விசாரிக்கின்றனா்.