ஹெளரா ரயிலில் 27 கிலோ குட்கா பறிமுதல்

ஹெளரா விரைவு ரயிலில் கடத்தி வரப்பட்ட 27 கிலோ குட்கா பொருள்களை இருப்புப்பாதை போலீஸாா் பறிமுதல் செய்து விசாரித்து வருகின்றனா்.

திருச்சி இருப்புப் பாதை போலீஸாா், விழுப்புரம் ரயில் நிலையத்திலிருந்து திருச்சி வரை ஹெளரா விரைவு ரயிலை (12663) வெள்ளிக்கிழமை இரவு சோதனையிட்டனா்.

அப்போது, ரயிலின் பின்புறம் உள்ள பொதுப்பெட்டியில் வெவ்வேறு இருக்கைகளுக்கு அடியில் கேட்பாரற்றுக் கிடந்த இரண்டு கைப்பைகளை சோதனையிட்டனா். சோதனையில், அந்தப் பைகளில் தமிழக அரசால் தடைசெய்யப்பட்ட 27 கிலோ குட்கா பொருள்கள் இருந்தது கண்டுபிடிக்கப்பட்டது.

அவற்றைப் பறிமுதல் செய்த போலீஸாா், திருச்சி இருப்புப் பாதை காவல் நிலையத்தில் ஒப்படைத்தனா். இதுகுறித்து போலீஸாா் வழக்குப் பதிந்து விசாரித்து வருகின்றனா்.