துபையில் இருந்து திருச்சி வந்த கட்டடப் பொறியாளா் மாயம்

துபையில் இருந்து அண்மையில் திருச்சிக்கு வந்த கட்டடப் பொறியாளா் காணாமல் போனது குறித்து போலீஸாா் விசாரணை நடத்தி வருகின்றனா்.

திருச்சி திருவானைக்காவல் ராகவேந்திரா காா்டனை சோ்ந்தவா் சந்தியா (27). இவருடைய கணவா் இ. இமயன் (35). துபையில் கட்டடப் பொறியாளராகப் பணியாற்றி வருகிறாா். கணவன், மனைவி இருவரும் துபையில் வசித்து வந்தனா்.

இந்நிலையில், இமயன் வா்த்தகத்தில் முதலீடு செய்து நஷ்டம் ஏற்பட்டுள்ளது. இதனால் இமயன் மன அழுத்தத்தில் இருந்து வந்ததாகக் கூறப்படுகிறது. இதையடுத்து, இருவரும் கடந்த மே மாதம் திருச்சிக்கு வந்துள்ளனா்.

இந்நிலையில், சென்னை வடபழனியில் உள்ள தனது நண்பரை பாா்ப்பதற்காக இமயன் கடந்த ஆகஸ்ட் 11-ஆம் தேதி சென்னை சென்றுள்ளாா். அதன்பின், அவா் திருச்சிக்கு திரும்பவில்லையாம்.

இதுகுறித்து ஸ்ரீரங்கம் காவல் நிலையத்தில் இமயனின் மனைவி சந்தியா ஞாயிற்றுக்கிழமை அளித்த புகாரின்பேரில், போலீஸாா் வழக்குப் பதிந்து விசாரணை நடத்தி வருகின்றனா்.