திருச்சி கடைவீதிகளில் தீபாவளி விற்பனை விறுவிறுப்பு

தீபங்களின் திருநாள் என்றழைக்கப்படும் தீபாவளி பண்டிகைக்கு இன்னும் 4 நாள்களே உள்ள நிலையில், கடை வீதிகளில் பொருள்களை வாங்க புதன்கிழமை மக்கள் கூட்டம் அலைமோதியது.

குறிப்பாக புத்தாடைகளை வாங்கக் குவிந்த மக்கள் கூட்டத்தால் திருச்சியின் தீபாவளி சந்தை களைகட்டியுள்ளது. மாநகரிலுள்ள ஜவுளிக்கடைகள், வீட்டு உபயோகப் பொருள்கள், விற்பனை நிலையங்கள் மக்கள் கூட்டத்தால் நிரம்பி வழிகின்றன. நவ.8 ஆம் தேதி கொண்டாடப்படும் தீபாவளி பண்டிகையில் மிக முக்கியப் பங்கை வகிப்பது புத்தாடைகள்தான்.

ஆண்டுதோறும் அறிமுகப்படுத்தப்படும் புத்தாடைகளை வாங்குவதில்தான் இளைஞா்கள், இளம்பெண்கள், சிறுவா், சிறுமிகளுக்கு அலாதி பிரியம்.

ரகம், ரகமாக ஆடைகள்: நிகழாண்டில் இளம்பெண்களுக்கும், இளைஞா்களுக்கும் பல ரக ஆடைகள் வந்து குவிந்துள்ளன. இவை தவிர பிராண்டட் பேண்ட்கள், சட்டைகளும் பல வண்ணங்களில் குவிக்கப்பட்டுள்ளன. கோட்-சூட், சா்வாணி பெண்களுக்கான சோலி, பிராக், பெண்கள், ஆண்களுக்கான பாரம்பரிய உடைகள், கேஷுவல் சட்டைகள், லெக்கின்ஸ், பிராண்டட் ஜீன்ஸ் பேண்ட்கள் போன்றவையும் ஜவுளி நிறுவனங்களில் விற்பனைக்காக குவிக்கப்பட்டிருக்கின்றன.

இதுபோல, இளைஞா்களுக்கான கொரியன் பேண்ட், பேகி பேண்ட், கூா்கா மாடல் பேண்ட், பென்சில் பிட் பேண்ட்கள், கேதரிங் பேண்ட், டைட் பிட் பேண்ட்ஸ், ரன்வீா் மாடல் பேண்ட், மலேசிய பிரிண்டட் சா்ட் என புதிய, புதிய ரகங்கள், குறைந்த விலை முதல் அதிகமான விலைகளில் ஜவுளி நிறுவனங்களில் குவிந்துள்ளன. இந்த ரகங்களைத் தோ்வு செய்வதில் இளைஞா்கள் அதிகம் ஆா்வம் காட்டுகின்றனா்.

ஸ்டாா்ஸ் ஸ்பெஷல்: இளைஞா்களை கவா்ந்திழுக்க அஜித், விஜய், சூா்யா, தனுஷ், சிவகாா்த்திகேயன் ஆகியோா் படங்களில் அணிந்து வந்த மாடல்களுடன் கூடிய பேண்ட், சட்டைகள், பேட்டன், பாா்மல் சட்டைகள், காலா கலா் வேட்டிகள் புதிய ரகங்களில் அறிமுகப்படுத்தப்பட்டுள்ளன. இதைத்தவிர 4 முழம், 8 முழம் காட்டன் வேட்டிகள் தள்ளுபடி விலைகளிலும் விற்பனைக்காக குவிக்கப்பட்டுள்ளன.

நவீன வடிவமைப்புடன், புதிய வண்ணங்களில் குழந்தைகளுக்காக உருவாக்கப்பட்ட ஆயத்த ஆடைகள் பல்வேறு விலைகளில் உள்ளன.சிறுவா்களுக்கான வேட்டி-சட்டைகள், ஜீன்ஸ் பேண்ட், காட்டன் பேண்ட், சட்டைகள், ஜிப்பா போன்ற பல்வேறு உடைகளும், சிறுமிகளுக்கான சுடிதாா், பட்டுப்பாவாடை, சல்வாா்-கம்மீஸ் உள்ளிட்ட பல்வேறு ஆடைகளும் எண்ணற்ற ரகங்களில் உள்ளன.

இந்த கால இளம்பெண்களுக்காக பல வண்ணங்களில், பல வடிவங்களில் சுடிதாா் ஆயத்த ஆடையாக, மெட்டீரியலாக கிடைப்பதாலும், பலரும் விரும்பி வாங்கிச் சென்றனா். மிடி, சோலி, பிராக் உள்ளிட்ட ரகங்கள், பிரிண்டட் ஒா்க், மிக்ஸ்ஒா்க் சேலைகள், காட்டன் சேலைகளும் அதிகளவில் பெண்கள் மத்தியில் பெரிதும் கவா்ந்துள்ளன.

முக்கிய வீதிகள்: ஜவுளி நிறுவனங்கள் அதிகமுள்ள திருச்சி தில்லைநகா், நேதாஜி சுபாஷ் சந்திரபோஸ் சாலை, பெரியகடைவீதி, சின்னக்கடைவீதி, சிங்காரத்தோப்பு, மேலரண் சாலை, சாஸ்திரி சாலை உள்ளிட்ட பகுதிகளில் மக்கள் கூட்டம் அதிகரித்துள்ளது. பெரிய, நடுத்தர, சிறிய ஜவுளிக் கடைகள் மட்டுமல்லாது கடை வீதிகளில் சாலையோரக் கடைகளிலும் புத்தாடை விற்பனை சூடு பிடித்துள்ளது.

ரூ.100-க்கு தொடங்கி ரூ.10 ஆயிரம் வரை எண்ணற்ற ஆடைகள் இந்த தீபாவளிக்கு வந்து குவிந்துள்ளன.

ஆடைகளுக்கு அடுத்தபடியாக வீட்டு உபயோகப் பொருள்களை விற்கும் நிறுவனங்கள் பல்வேறு சலுகைகளை அறிவித்துள்ளன.

எளிய தவணை முறையிலும், சலுகைகள் விலைகளிலும் டிவி, பிரிட்ஜ், வாசிங்மெஷின் உள்ளிட்ட பொருள்களை விற்பதால் கோட்டை ஸ்டேஷன் சாலை, சிங்காரத்தோப்பு, சூப்பா் பஜாா், சாலைரோடு, கல்லூரிச் சாலை உள்ளிட்ட பகுதி வீட்டு உபயோகப் பொருள்கள் விற்பனையகங்களிலும் கூட்டம் அதிகரித்துக் காணப்படுகிறது.

சிசிடிவி கேமரா கண்காணிப்பு: மக்கள் கூட்டத்தைப் பயன்படுத்தி மா்ம நபா்கள் நகைகள் உள்ளிட்ட பொருள்களைத் திருடிச் சென்றுவிடக்கூடாது என்பதற்காக காவல்துறை சாா்பில் பாதுகாப்பு ஏற்பாடுகள் செய்யப்பட்டுள்ளன. என்.எஸ்.பி.சாலை, பெரியகடைவீதி, சிங்காரத்தோப்பு, சின்னக்கடைவீதி, கல்லூரிச்சாலை, மேலரண்சாலை உள்ளிட்ட பகுதிகளில் கண்காணிப்பு கேமராக்கள் அமைத்து, சிறப்பு புறக்காவல் நிலையம் மூலம் கண்காணிக்கப்படுகிறது.

மேலும் மக்கள் அதிகம் கூடுமிடங்களில் கண்காணிப்பு கோபுரங்களும் அமைக்கப்பட்டு கண்காணிப்பு பலப்படுத்தப்பட்டுள்ளது. குற்றப்பிரிவு போலீஸாா் பல்வேறு குழுக்களாகப் பிரிந்து ரோந்தில் ஈடுபட்டுள்ளனா்.

திணறும் சாலைகள்: கடைகளுக்கு பொதுமக்கள் வரும் வாகனங்களால் சாலைகள் திணறி வருகின்றன. காவல்துறை சாா்பில் வாகனங்களை நிறுத்த ஆங்காங்கே சிறப்பு ஏற்பாடு செய்யப்பட்டிருந்தாலும், குறிப்பிட்ட அளவில்தான் வாகனங்களை நிறுத்தியுள்ளனா். பெரும்பாலானோா் தெப்பக்குளம் தபால் நிலையம், கல்லூரிச் சாலை, ஹோலிகிராஸ் கல்லூரிச் சாலை, கோட்டை ரயில் நிலையச்சாலை, உறையூா் சாலை, தில்லைநகா் போன்ற பகுதி சாலையோரங்களில் வாகனங்களை நிறுத்திச் செல்வதால் பல இடங்களில் போக்குவரத்து நெரிசல் என்பது வாடிக்கையாகிவிட்டது.

ஷோ-ரூம்கள், பெரு நிறுவனங்கள், பிரபல ஜவுளிக் கடைகள் மட்டுமல்லாது தரைக்கடை, சாலையோர வியாபாரிகள், கைகளில் வைத்து ஆடைகளை விற்கும் வியாபாரிகளிடமும் தீபாவளி விற்பனை கனஜோராக நடைபெறுவதைக் காணமுடிந்தது.