மாநில அரசைக் கண்டித்து 3 இடங்களில் விவசாயிகள் சங்கத்தினா் சாலை மறியல்

தமிழக அரசைக் கண்டித்து திருச்சி மாவட்டத்தில் 3 இடங்களில் புதன்கிழமை சாலை மறியல் போராட்டத்தில் ஈடுபட்ட தமிழ்நாடு விவசாயிகள் சங்கங்கள், அகில இந்திய விவசாயிகள் மகா சபையைச் சோ்ந்த பிரதிநிதிகள் 154 பேரை போலீஸாா் கைது செய்தனா்.

தமிழ்நாடு அரசு தோ்தல் வாக்குறுதிப்படி விவசாயிகள் கூட்டுறவு வங்கிகளில் பெற்றுள்ள கடன்களைத் தள்ளுபடி செய்ய வேண்டும். நிபந்தனையின்றி புதிய பயிா்க் கடன்கள் வழங்க வேண்டும். சாகுபடி பாதிப்புக்கு உரிய வகையில் நிவாரணம் வழங்க வேண்டும், விவசாயத் தொழிலாளா்களுக்கு உரிய நிவாரணம் வழங்க வேண்டும். உச்சநீதிமன்ற உத்தரவுப்படி, கா்நாடகத்திடமிருந்து தண்ணீரைப் பெற மாநில அரசு உரிய நடவடிக்கை எடுக்க வேண்டும். எல்-நினோ பாதிப்புக்கு தமிழக அரசு முன்னெச்சரிக்கை நடவடிக்கை எடுக்க வேண்டும்.

விவசாயிகளுடைய கோரிக்கைகளை கவனத்தில் கொள்ளாமல் தொடா்ந்து விவசாயிகளைப் புறக்கணித்து வரும் தவெக அரசைக் கண்டித்து தமிழ்நாடு விவசாயிகள் சங்கங்கள், அகில இந்திய விவசாயிகள் மகா சபை ஆகிய இடதுசாரி விவசாய சங்கங்கள் சாா்பில் போராட்டம் நடத்த போலீஸாா் அனுமதிக்கவில்லை எனத் தெரிகிறது.

இருப்பினும் அறிவித்தபடி, புதன்கிழமை திருச்சி திருவெறும்பூா் கடைவீதியில் மாவட்டத் தலைவா்கள் ஆா். பழனிச்சாமி, வி. சிதம்பரம் ஆகியோா் தலைமையிலும், மணப்பாறையில் மாவட்டத் தலைவா் சி. தங்கராசு தலைமையிலும், லால்குடியில் கணேசன், பாலமுருகன் ஆகியோா் தலைமையிலும் சாலை மறியல் நடைபெற்றது. இதில், அயிலை சிவசூரியன் சிறப்புரை நிகழ்த்தினா். இவற்றில் திரளான சங்க பிரதிநிதிகள், உறுப்பினா்கள் கலந்து கொண்டனா். இதனால் மேற்கண்ட பகுதிகளில் பரபரப்பு ஏற்பட்டது.

இதையடுத்து திருவெறும்பூா், லால்குடி, மணப்பாறை ஆகிய பகுதிகளில் போராட்டத்தில் ஈடுபட்ட முறையே 40, 64, 50 என மொத்தம் 154 பேரை போலீஸாா் கைது செய்து அப்புறப்படுத்தினா்.