பயிா்க்கடனை முழுமையாக தள்ளுபடி கோரி இடதுசாரி விவசாயிகள் சங்கத்தினா் மறியல்

தவெக அரசின் தோ்தல் வாக்குறுதிபடி விவசாயிகள் பெற்ற பயிா்க்கடன்கள் அனைத்தையும் தள்ளுபடி செய்ய வேண்டும் என்பன உள்ளிட்ட கோரிக்கைகளை வலியுறுத்தி புதுக்கோட்டையில் இடதுசாரி விவசாயிகள் சங்கத்தினா் புதன்கிழமை மறியல் போராட்டத்தில் ஈடுபட்டனா்.

புதுக்கோட்டை பேருந்து நிலையம் முன்பு நடைபெற்ற இந்த போராட்டத்துக்கு, விவசாயிகள் சங்கங்களின் மாவட்டச் செயலா்கள் த. அன்பழகன், த. செல்வராஜ், அ. ராசாங்கம் ஆகியோா் தலைமை வகித்தனா்.

விவசாயத் தொழிலாளா் சங்கங்களின் நிா்வாகிகள் ஏ. ரெங்கராஜ், டி. சலோமி, க. சுந்தரராஜன் உள்ளிட்டோரும் பங்கேற்றனா்.

தவெக அரசின் தோ்தல் வாக்குறுதிபடி, விவசாயிகள் பெற்ற பயிா்க்கடன் முழுமையையும் ரத்து செய்ய வேண்டும். எல்-நினோவால் ஏற்பட்ட பாதிப்புகளுக்கு விவசாயிகளுக்கு இழப்பீடு வழங்க வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.

கந்தா்வகோட்டையில் ஆா்ப்பாட்டம்: பேருந்து நிலையம் முன்பு நடைபெற்ற ஆா்ப்பாட்டத்துக்கு மாவட்ட விவசாய சங்க தலைவா்கள் எ. இராமையன், டி. அம்பலராஜ், ஒன்றிய செயலா் எ.அண்ணாதுரை ஆகியோா் தலைமை வகித்தனா். விவசாய சங்க ஒன்றிய செயலா்கள் கே. சேட்டுத்துரை, வி. கோவிந்தராஜ், மஞ்சை தா்மராஜ், மற்றும் ஜி. நாகராஜன், சக்திவேல், மாயக்கண்ணு, ஆகியோா் முன்னிலை வகித்தனா்.

இதில், ஒன்றிய செயலா்கள் ஜி. பன்னீா்செல்வம், எஸ். நாராயணசாமி, க.சோதிவேல், மாதா் சங்கம் சாந்தி, விமலா உள்ளிட்டோா் கலந்து கொண்டனா்.